Зрэшты, да гэтага артыкула ў Адміністрацыйным кодэксе ёсць заўвага пра тое, што пад яго дзеянне не падпадае адукацыйная дзейнасць і правядзенне культурніцкіх мерапрыемстваў. Менавіта адукацыйную дзейнасць меў на мэце знакаміты віцебскі фотамастак і калекцыянер Віктар Барысенкаў, які сабраў некалькі дзясяткаў рэдкіх фотаздымкаў акупаванага Віцебска і выставіў іх асобным альбомам у Фэйсбуку. На некаторых фотаздымках, якія былі зроблены ў 1941-1944 гадах, сустракаліся выявы фашыстоўскай сімволікі. Што заканамерна, бо гэта дакументальнае фота, якое адлюстроўвае рэчаіснасць. Тым не менш, Віктара Барысенкава абвінавацілі ў прапагандаванні нацысцкай сімволікі і пакаралі арыштам на 7 сутак. Суддзя Уладзімір Царыкаў (суд Кастрычніцкага раёну Віцебску) не прыняў да ўвагі тое, што калекцыянер Віктар Барысенкаў даўно займаецца краязнаўствам і выкарыстоўвае гістарычныя здымкі гораду падчас сваіх лекцый, адну з якіх ён і прысвяціў якраз гісторыі Віцебску падчас Вялікай Айчыннай вайны…

Арганізатары фотавыставы на праваслаўным фестывалі зрабілі практычна тое самае – выставілі на ўсеагульны агляд гістарычныя фотаздымкі. Аднак, улічваючы інцыдэнт з пакараннем Віктара Барысенкава, здымкі са свастыкай трэба альбо прыбраць з экспазіцыі і пакараць тых, хто выставіў іх для публічнага дэманстравання, або прызнаць, што заканадаўства ў Беларусі дзейнічае выбарачна. І прыватную асобу за нібыта прапагандаванне нацысцкай сімволікі прыцягнуць да адміністрацыйнай адказнасці можна, а ўдзельнікаў імпрэзы, падрыхтаванай на дзяржаўным узроўні, за тое самае караць ужо не выпадае.

Станіслаў Іваноўскі