Адным зь першых паведамленьне аб тым, што супраць яго вядзецца адміністрацыйны працэс, атрымаў віцебскі актывіст Уладзімер Кійко. Пратакол паводле ч.3 арт. 23.34 быў складзены 9 студзеня маёрам Андрэем Зуевым.
«У руках трымаў плякат з надпісам «незалежнасьць» і плякат з надпісам «Лукашэнку зь яго бандай – ганьба! Абаронім краіну! Не – інтэграцыі!», выкрыкваў лёзунгі «Жыве Беларусь» і «Незалежнасьць!» – напісаў у пратаколе міліцыянт. Гэтым, на яго думку, актывіст парушыў «парадак правядзеньня пікетаваньня».
«Супрацоўнік міліцыі, зь якім я размаўляў па тэлефоне і які складаў пратакол, спытаў у мяне, ці быў я на плошчы Перамогі 29 сьнежня а 12-й гадзіне. Я не адмаўляў. Бо ня бачу ў гэтым нічога супрацьзаконнага. Наадварот, лічу сваім абавязкам грамадзяніна адкрыта выказваць свае меркаваньні і асьцярогі наконт магчымай анэксіі. Калі незалежнасьць пад пагрозай, мы ня маем права маўчаць!» – сказаў «Віцебскай Вясьне» Уладзімер Кійко.
Разгляд справы адбудзецца ў судзе Чыгуначнага раёну Віцебску 17 студзеня ў 10.00.
Прохараў, Севярынец, Паўлаў…
Як стала вядома, пратаколы складзеныя і на іншых удзельнікаў акцыі. Гэтак, суд над Аляксеем Прохаравым адбудзецца 15 студзеня (пачатак –а 10-й). Нагадаем, 26 сьнежня Аляксея аштрафавалі на 127 рублёў за рэпост у сацыяльных сетках.
Таксама ў міліцыю выклікалі Тацяну Севярынец, але ў Віцебску яе не было – дата суду пакуль невядомая.
Яшчэ аднаму ўдзельніку акцыі Алегу Паўлаву паведамілі, што ў дачыненьні да яго вядзецца адміністрацыйны працэс. Дата суду яшчэ ня вызначаная.
Акцыя ў падтрымку незалежнасьці прайшла ў Віцебску 29 сьнежня 2019 году. У той дзень, каб выказаць сваё нэгатыўнае стаўленьне да магчымай інтэграцыі з Расеяй і ў падтрымку незалежнасьці Беларусі, выйшлі на плошчу Перамогі каля 15 актывістаў. Акцыю здымалі на відэакамэру людзі ў цывільным. Хутчэй за ўсё, іх запісы будуць дэманстравацца ў ходзе судовых пасяджэньняў у якасьці доказаў.
«Віцебская Вясна» адсочвае сытуацыю.
Уладзімер Бяляўскі