КДБ устанавіў прафіляктычны нагляд за Андрэем Гайдуковым
За былым палітвязьнем Андрэем Гайдуковым, які 8 траўня выйшаў на волю з папраўчай калёніі “Віцьба-3″ пасьля паўтара года зьняволеньня, устаноўлены прафіляктычны нагляд. “На падставе артыкулу, паводле якога я адбываў пакараньне, нагляд з боку МУС мне даць ня могуць. Але КДБ устанавіў свой прафіляктычны нагляд, афіцыйна азнаёміўшы мяне, што ў дачыненьні да мяне распачатыя прафілактычныя справы, — паведаміў актывіст. — Гэта ім дае легальна ажыцьцяўляць праслухоўваньне, назіраньне за мной, прыходзіць да мяне ў любы час дня і ночы. Ім гэта трэба, каб легалізавацца на выпадак далейшых сваіх дзеяньняў у дачыненьні да мяне”.
Паўлу Севярынцу вынесенае афіцыйнае папярэджаньне
8 траўня сустаршыня аргкамітэту па стварэньні партыі «Беларуская хрысьціянская дэмакратыя» Павал Севярынец быў выкліканы ў крымінальна-выканаўчую інспэкцыю Фрунзэнскага раёну Менску, дзе яму вынесьлі афіцыйнае папярэджаньне «пра недапушчальнасьць супрацьпраўных дзеяньняў». Павал Севярынец зьвязвае гэта з чэмпіянатам сьвету па хакеі, які распачынаецца ў Менску.
Калгасы Пастаўшчыны праігнаравалі кірмаш, арганізаваны ўладамі
Зь дзевяці сельгаспрадпрыемстваў у кірмашы ўзялі ўдзел толькі тры гаспадаркі. Такія кірмашы мясцовыя ўлады арганізоўваюць як мінімум два разы на год. Удзел гаспадарак у іх можна вызначыць як добраахвотна-прымусовы. Гаспадаркам прадпісваюць колькасьць прадукцыі, якую яны павінны прывезьці на кірмаш.
Незалежную журналістку пазбавілі магчымасьці абскардзіць рашэньне міліцыі
Журналістка Алена Сьцяпанава атрымала пісьмовае паведамленьне з Кастрычніцкага РАУС Віцебску пра тое, што адміністрацыйная справа, распачатая супраць яе, скасаваная. Аднак афіцыйную пастанову ёй не даслалі, і тэрмін для абскарджаньня пастановы ўжо скончыўся.
Дзяржорганы адмовіліся зьвяртацца ў Канстытуцыйны суд
Віцебскі праваабаронца Леанід Сьвецік ня здолеў пераканаць найвышэйшыя дзяржаўныя органы зьвярнуцца ў Канстытуцыйны суд Беларусі. Праваабаронца хацеў даведацца пра пазыцыю суду наконт адпаведнасьці артыкулаў 120, 122-124 Крымінальна-працэсуальнага кодэксу Канстытуцыі краіны і міжнародным дамовам.
Кампанія за пабудову новага паліклінічнага комплексу распачалася ў Віцебску
У Віцебску адбылося першае паседжаньне сяброў і прыхільнікаў “Беларускай хрысьціянскай дэмакратыі”, якія ў межах кампаніі “Народнае самакіраваньне” будуць вырашаць праблему пабудовы паліклінічнага комплексу ў мікрараёне Білева. На паседжаньні былі абмеркаваныя пытаньні кампаніі, прайшоў трэнінг, а пасьля ўдзельнікі паседжаньня выйшлі “ў поле”. За адзін дзень сабрана больш за 200 подпісаў. Пробны выхад быў яшчэ 2 траўня, калі было сабрана 107 подпісаў.
Віцебскі абласны суд ня стаў публічна разглядаць справу Георгія Станкевіча
Настаўнік зь Бешанковічаў, паэт і бард Георгі Станкевіч падаў касацыйную скаргу на рашэньне раённага суду, які 3 красавіка аштрафаваў яго на 50 базавых велічынь за выраб і распаўсюд газэты “Крывінка”, якая выдаецца на ўласныя сродкі заснавальніка. Аднак сам Станкевіч ня змог прыехаць на разгляд скаргі. Судзьдзя Сьвятлана Іванова праігнаравала тую акалічнасьць, што ў судовай залі сабраліся неабыякавая да выніку людзі, віцебскія праваабаронцы, і ня стала разглядаць справу публічна.
Андрэй Гайдукоў – на волі!
Вызваленьне з калёніі «Віцьба-3» палітвязьня Андрэя Гайдукова стала сапраўднай спэцапэрацыяй, арганізаванай з мэтай не дапусьціць ягоную сустрэчу ля турэмнай брамы. Андрэю Гадукову загадалі пачаць зьбіраць рэчы а 6-й раніцы, хоць звычайна з калёніі выпускаюць аб 11-й. А 7-й яго пасадзілі ў міліцэйскі аўтамабіль, адвезьлі на вакзал у Віцебску, далі 20 тысяч рублёў, каб ён змог даехаць да сваякоў. Такім чынам, каля турэмнай брамы яго сустрэць не ўдалося.
Віцебск застаецца лідэрам па коштах на жытло
Цэны на кватэры ў Віцебску па-ранейшаму вышэйшыя за іншыя абласных цэнтры. Аднак з пачатку году сярэдняя цана прададзеных кватэр у горадзе над Дзьвіной вырасла ўсяго на 0,9%, а яшчэ ж у IV квартале 2013 году тэмпы росту складалі вялікія 6,9%, паведамляе realt.by.
Незалежны прафсаюз работнікаў «Нафтану» падаў у суд на Наваполацкі гарвыканкам
2 траўня пяршоўка Беларускага незалежнага прафсаюзу (БНП) працаўнікоў ААТ «Нафтан» падала пазоў у суд на Наваполацкі гарвыканкам, паведаміў лідэр арганізацыі Іван Сьвятоха (на фота). Адзінае патрабаваньне да ўладаў - адмяніць рашэньне аб ануляваньні рэгістрацыі дадатковага пагадненьня пяршоўкі БНП аб далучэньні да калектыўнай дамовы.