Пятніца, 04 Снежань 2020

Ксяндза Вячаслава Барка пакаралі 10 суткамі арышту – за публікацыю плакату Цэслера ў сацсетках

Ацаніць гэты матэрыял
(0 галасоў)
Ксёндз Вячаслаў Барок Ксёндз Вячаслаў Барок

Каталіцкаму святару з Расонаў Вячаславу Барку прысудзілі 10 сутак арышту паводле адміністрацыйнага артыкулу 17.10 (прапаганда нацысцкай сімволікі або атрыбутыкі). Адбываць пакаранне будзе ў Наваполацку. Каб падтрымаць святара, на суд у Расоны прыязджаў біскуп Віцебскі Алег Буткевіч, паведамляе TUT.BY, спасылаючыся на сяброў ксяндза Барка ў сацсетках.

Каталіцкі святар з гарадскога пасёлку Расоны Вячаслаў Барок у жніўні апублікаваў у сацыяльных сетках плакат мастака Уладзіміра Цэслера. 1 снежня ў мясцовым РАУС Барок даведаўся, што яго абвінавачваюць у прапагандзе нацысцкай сімволікі або атрыбутыкі (артыкул 17.10 КаАП). У той жа дзень пачаўся суд, але ў працэсе абвясцілі перапынак.

3 снежня суд Расонскага раёну пастанавіў пакараць святара 10 суткамі адміністрацыйнага арышту.

Уладзімір Цэслер у сацсетках размясціў зварот у абарону Вячаслава Барка:

«Той факт, што публікацыя маёй антыфашысцкай работы на старонцы святара Вячаслава Барка ў сетцы Інтэрнэт расцэненая як дэманстрацыя нацысцкай сімволікі, выклікае здзіўленне, супярэчыць маёй мастацкай задуме падчас працы над творам. Для кожнага, у каго ёсць вочы, розум і сэрца, відавочная антыфашысцкая пазіцыя касцёлу», – напісаў Цэслер.

Сам Вячаслаў Барок заяўляў, што адміністрацыйны працэс у дачыненні да яго палітызаваны.

«Старэйшы оперупаўнаважаны крымінальнага вышуку Гаўрылаў, кіруючыся, як ён сам сказаў, асабістым меркаваннем, 25 лістапада заўважыў у маіх сацыяльных сетках пост, размешчаны ў жніўні. Ён лічыць, што я размясціў свастыку – нацысцкі сімвал. Я патлумачыў, што я размясціў мастацкі твор славутага мастака Уладзіміра Цэслера «Стоп лукашызм», а не нямецкую свастыку. Я супраць фашызму, камунізму, любога таталітарнага рэжыму. Гэты плакат я размясціў, выказваючы свой пратэст супраць гвалту ў краіне», – распавёў Вячаслаў Барок.

Ксёндз вядзе свой канал на YouTube. Ён разважае ў казаннях у тым ліку і пра палітыку.

На выпадак свайго арышту ксёндз запісаў зварот да вернікаў.