19 сакавіка ў судзе Кастрычніцкага раёну Віцебску скончыўся разгляд грамадзянскага пазову адлічанай з другога курсу ВДМУ Паліны Нітчанкі. Студэнтка патрабавала адмяніць дысцыплінарныя спагнанні і аднавіць яе ў навучальнай установе, а таксама – спагнаць з універсітэту судовыя выдаткі. Суд адмовіў у задавальненні іску ў поўным аб'ёме.

Перад Днём волі студэнтаў Полацкага дзяржаўнага ўніверсітэту просяць падпісаць паперы аб тым, што яны азнаёміліся са зменамі ў адміністрацыйным артыкуле 24.23 («Парушэнне парадку арганізацыі або правядзення масавых мерапрыемстваў», колішні арт. 23.24). Але просяць так, што больш падобна да прымусу. Пра гэта сведчыць аўдыёзапіс, які «Віцебскай Вясне» даслалі нашыя чытачы з Полацку.

Жыхары Віцебску падзякавалі за грамадзянскую пазіцыю і сумленнасць Уладзіміру Мартаву – загадчыку аддзялення анестэзіялогіі і рэанімацыі гарадской клінічнай больніцы хуткай медычнай дапамогі, якога звальняюць з 3 красавіка. Відэа акцыі ў падтрымку лекара размясціў тэлеграм-канал «Віцебск неверагодны», піша TUT.BY.

6 сакавіка ў Віцебску прайшла канферэнцыя Віцебскай гарадской арганізацыі Беларускай сацыял-дэмакратычнай партыі (Грамада). Удзел у ёй узяў старшыня партыі Ігар Барысаў. У сакавіку споўнілася 30 гадоў з дня ўтварэння БСДП. Устаноўчы з’езд арганізацыі прайшоў 2-3 сакавіка 1991 году.