Прадстаўнікі ўладаў і служб ЖКГ праводзяць сходы з насельнікамі віцебскіх шматпавярховак, распавядаючы ім пра антысанітарыю і іншыя праблемы, звязаныя з функцыянаваннем смеццеправодаў. Але, як высветляецца, у горадзе яшчэ анічога не вырашана пра альтэрнатыву: на сходах людзям нават не могуць патлумачыць, дзе канкрэтна ў іхных дварах абсталююць пляцоўкі для утылізацыі смецця, ці будуць яны ў кожным двары , а калі не - то на якой адлегласці ад дамоў.

Чамусьці логіка адказных службаў такая: спачатку людзі мусяць пагадзіцца на тое, каб смецццеправод заварылі, а ўжо потым будзе вырашацца, дзе абсталяваць пляцоўку з кантэйнерамі. Зразумела, што пры такім падыходзе людзі масава адмаўляюцца ад заварвання смеццеправодаў, і аргументы пра антысанітарыю аніяк не дзейнічаюць.

Нагадаем, у лістападзе мінулага году віцяблянам было безапеляцыйна заяўлена    : у абласным цэнтры будуць змагацца за раздзельны збор смецця, а таму бліжэйшым часам жыхарам шматпавярховак трэба рыхтавацца да таго, што смеццеправоды ў іх завараць. Такая пазіцыя выклікала незадавальненне часткі гараджан, і ўлады вырашылі пакуль не рызыкаваць. Прынамсі было паабяцана , што да прэзідэнцкіх выбараў усё застанецца як ёсць, - відавочна, каб не злаваць “электарат”. Цяпер да гэтай тэмы вяртаюцца зноў, але згоды па-ранейшаму няма.

Марына Квінт