Субота, 15 Май 2021

Студэнтка Марыя Агіевіч выйшла на волю пасля 10 дзён за кратамі віцебскага ІЧУ

Ацаніць гэты матэрыял
(1 голас)
Марыя Агіевіч пасля вызвалення Марыя Агіевіч пасля вызвалення

15 траўня пасля 10-дзённага арышту на волю выйшла студэнтка 4 курсу ВДУ імя Машэрава Марыя Агіевіч. Яна адбывала пакаранне за фота з сяброўкамі, якое яны зрабілі пад Кіраўскім мостам у Віцебску (арт. 24.23 КаАП). Сустрэць дзяўчыну на выхадзе з ІЧУ не ўдалося.

У прызначаную гадзіну да сцен віцебскага ізалятару часовага ўтрымання (ІЧУ) прыйшлі з кветкамі сябры і сваякі Марыі Агіевіч. Але, як аказалася, незадоўга да завяршэння тэрміну арышту супрацоўнікі міліцыі адвезлі студэнтку ў Кастрычніцкі РАУС для прафілактычнай размовы. Сустрэча з блізкімі адбылася на вул. Церашковай, насупраць аддзялення міліцыі.

Марыя Агіевіч разам з Марыяй Амасовіч і Лізаветай Кірыенка былі прызнаныя вінаватымі ва ўдзеле ў несанкцыянаванай акцыі. Суддзя Вольга Шапавал (суд Чыгуначнага раёну) палічыла іх сумеснае фатаграфаванне з бел-чырвона-белым сцягам пад Кіраўскім мостам у Віцебску незаконным пікетаваннем. Фотаздымак міліцыянты знайшлі ў тэлефоне Лізаветы Кірыенка, калі тая ўжо знаходзілася за кратамі.

«Мы проста фатаграфаваліся і нікуды не выкладалі фотку, але яны сказалі, што ціпа ў нас быў мітынг», – расказала пасля вызвалення Марыя Агіевіч.

Паводле супрацоўнікаў МУС, гэтае «масавае мерапрыемства» адбылося 27 сакавіка, а затрымалі Агіевіч 5 траўня.

«Спачатку выклікалі па тэлефоне ў РАУС, а потым – позвай. У першы раз я сама з'явілася, а ў другі раз яны мяне затрымалі, хаця адвакат іх пераконваў, што я дабравольна магу прыехаць на суд. Але мяне ўсё роўна затрымалі...» – успамінае дзяўчына.

Марыя распавяла, што ў камеры ізалятару знаходзілася разам з іншымі «палітычнымі» дзяўчатамі, асуджанымі паводле арт. 24.23 – Лізаветай Кірыенка, Марыяй Амасовіч, Ангелінай Туравец, а таксама дзяўчынай Аленай, прозвішча якой не запомніла.

«Проста да астатніх там больш-менш нармальна ставіліся, а да нас – не, таму і запіхнулі нас у адну камеру», – патлумачыла Марыя Агіевіч.

Пра падрабязнасці ўтрымання ў ІЧУ Марыя нічога больш не расказала, спаслаўшыся на стомленасць.

Уладзімір Бяляўскі