Пра гэта паведаміў віцебскі праваабаронца Леанід Сьвецік, які вядзе ліставаньне зь вязьнем папраўчай калёніі №14 (Навасады). Навіну пра ўзмацненьне жорсткасьці ўмоваў адбыцьця пакараньня актывіст даведаўся з апошняга ліста палітвязьня, адрасаванага яму.

У лісьце Міхаіл Ігаравіч паведамляе, што ў цяперашні час ён знаходзіцца ў двухмясцовай камэры. Камэра мае ўсё неабходнае для больш-менш ніштаватага існаваньня. Прэса, лісты, «атаварка» і прагулкі прадугледжаныя рэжымам ПКТ.

«Пра прычыны зьмяшчэньня намякнуў супрацоўнік выхаваўчага аддзелу, маёр Крэмень на папярэдняй гутарцы. Я павінен адмовіцца ад праваабарончай дзейнасьці і палітычных перакананьняў. У адваротным выпадку мяне чакае наступная прыступка выпраўленьня. Якая – не сказаў, хутчэй за ўсё, нейкая турма або БУР (блёк узмоцненага рэжыму)», – паведамляе на волю палітвязень.

Аднак адмаўляцца ад сваіх палітычных поглядаў Міхаіл Ігаравіч не зьбіраецца. Ён упэўнены ў сваёй правасьці і маральнай перавазе над сваімі мучыцелямі. «Тое, што мяне ўсяляк спрабуюць прэсаваць, я ўспрымаю як доказ значнасьці і страху перад маёй дзейнасьцю», – адзначае Жамчужны.

Лявон Яфрэменка