Відэаролік «Паклонімся лекарам» стварылі віцебскія актывісты ініцыятывы «ByCovid19-Витебск», якія ад пачатку эпідэміі дапамагаюць мэдыкам змагацца з хваробай. Пад песьню на словы і музыку Алега Філіпенкі (выканаўцы – Даша Юшкевіч і Амік Арапецян) у відэароліку дэманструюцца фотаздымкі лекараў падчас пандэміі.
«Валянтэрамі руху «ByCovid19-Витебск» створаны відэаролік «Паклонімся лекарам», які выказвае захапленьне, павагу, удзячнасьць і падтрымку мэдычным работнікам Віцебшчыны. У сувязі з гэтым прашу прыняць неадкладнае рашэньне аб шырокім тыражаваньні відэароліка на мясцовых тэлевізійных каналах ды інфармацыйных экранах гораду», – просіць у звароце да кіраўнікоў выканаўчай і прадстаўнічай галінаў улады Павал Левінаў.
Прадстаўнік Беларускага Хэльсынскага камітэту ў Віцебскай вобласьці і сябра грамадзкага камітэту ўпаўнаважаных па правах чалавека «Правы для ўсіх», Левінаў падкрэсьлівае, што мэдыкі апынуліся зараз «на пярэднім краі барацьбы за жыцьцё і здароўе грамадзян, у тым ліку – выбарцаў».
Зьміцер Міраш