Аўторак, 14 Жнівень 2018

Эколягі зьбіраюцца аднавіць плаціны на балоце Жада на Мёршчыне – падтрымайма!

Ацаніць гэты матэрыял
(0 галасоў)
Фота: ​bahna.land Фота: ​bahna.land

Эколягі і валянтэры зьбіраюцца ў сярэдзіне жніўня на балоце Жада, каб адрамантаваць больш за 100 плацін, якія былі ўсталяваныя там у 2011 годзе. Дзеля гэтага ладзіцца адмысловы летнік, але для яго правядзеньня патрэбныя грошы. Падтрымаць добрую і карысную справу можна на краўдфандынг-пляцоўцы “Талака”.

“ЖАДАны летнік” па аднаўленьні плацін будзе праходзіць на балоце ад 17-га да 26-га жніўня. На яго правядзеньне патрабуецца крыху больш за 900 рублёў. Ладзіць прыродаахоўны летнік грамадзкае аб’яднаньне “Ахова птушак Бацькаўшчыны” (АПБ).

Але дапамагчы балоту можна ня толькі фінансава, але і фізычна – стаць валянтэрам і ўдзельнікам летніку. Каб зрабіць гэта, трэба запоўніць рэгістрацыйную анкету. Калі не атрымліваецца на ўвесь тэрмін, можна папрацаваць на Жадзе некалькі дзён. Арганізатары паведамляюць, што самы праблематычны пэрыяд – сярэдзіна тыдня. “Любая дапамога істотная і важная”, – пішуць.

Валантэрскі летнік на Ельні. Фота: ptushki.org

Трэба будзе пілаваць дрэвы і капаць торф. З сабой на балота трэба ўзяць спальнік (валянтэры будуць жыць у намётах), балотныя боты ды сродак ад камароў.

Рэспубліканскі водна-балотны заказьнік “Жада” разьмяшчаецца ў Шаркоўшчынскім і Мёрскім раёнах і займае плошчу каля 7 тыс. га. Гэта частка вялікай балотнай сыстэмы, у якую ўваходзіць і знакамітае балота Ельня.  

“У свой час гэтую Жаду актыўна асушалі, палова балота была перакапаная каналамі. У 2011 годзе АПБ узялася за аднаўленьне балота.  Для гэтага на каналах паставілі каля 100 плацін. Але з гадамі яны прыходзяць у кепскі стан і ўжо не ўтрымліваюць ваду як сьлед. Іх трэба рамантаваць”, – тлумачаць эколягі.

     

Плаціна, якая патрабуе рамонту. Фота: М. Чэркас

Як паведамляюць актывісты АПБ, Жада – вельмі прыгожае верхавое балота, якое стала домам для кані, чорнага бусла, балотнай савы, жураўля, вераб’інага сыча ды іншых птушак, а таксама для 348 відаў вышэйшых судзінавых расьлінаў (1/5 агульнай колькасьці ў Беларусі).

Зьміцер Міраш

Залагініцца каб дадаць камэнтары