Першымі на праблему звярнулі ўвагу жыхары новага пяціпавярховага дома, крыху пазней трывогу забілі і ўладальнікі бліжэйшых індывідуальных дамоў. Па іх словах, перапоўненыя кантэйнеры не толькі псуюць выгляд і служаць крыніцай антысанітарыі, смецце, якому не знайшлося месца ў кантэйнеры, актыўна расцягваюць сабакі, каты і птушкі.

У адказ на пытанне, чаму так адбываецца, у "Браслаў-камунальніку" толькі разводзяць рукамі. Там кажуць, што яны рады былі б выканаць свае абавязацельствы, але смеццявоз не можа пад'ехаць, бо не гатовы праезд. Так-сяк спрабавалі насіць смецце да машыны ўручную, але не лічаць гэта выйсцем.

Як пракаментаваў намеснік старшыні Браслаўскага райвыканкама Пётр Белусь, справа тут у зацягнутых тэрмінах добраўпарадкавання тэрыторыі новабудоўлі. ПМК-42 значна перавысіла часовыя нарматывы, у выніку чаго ўзнікла патавая сітуацыя: людзей засялілі, смецця на этапе рамонту і добраўпарадкавання вельмі шмат, а вывезці яго нельга.

«Разам з тым работы па прывядзенні ў парадак прылеглай да дома тэрыторыі працягваюцца. Пад'язныя шляхі і паркоўка бетануюць, узводзіцца дзіцячая пляцоўка, рыхтуюцца пляцоўкі пад газоны. Пры гэтым тэхніка ПМК (за адсутнасцю дарогі) перамяшчаецца там, дзе не трэба было б: па пешаходных дарожках і пажарных праездах. Ці трэба казаць, што ў выніку моцна пакутуюць тратуары, дзе плітка літаральна ўстае дыбам?», - кажа чыноўнік.

Паводле браслаўскіх уладаў, запыт з просьбай растлумачыць сітуацыю і пазначыць шляхі і тэрміны яе вырашэння ўжо накіраваны ў ПМК-42. Праблема застаецца на кантролі намесніка старшыні райвыканкама, які курыруе галіну.

А пакуль горы смецця так і застаюцца, а навасёлам дома №28 і жыхар прылеглых дамоў і далей даводзіцца летам жыць у антысанітарыі з забруджаным паветрам.

Сяргей Шумаў