Пры гэтым ён згадаў, што дзяржава аказвае шматдзетным сем'ям вялізную падтрымку. Таму яно мае права і патрабаваць ад бацькоў належнага выканання іх абавязкаў па выхаванні падрастаючага пакалення. Пра гэта кіраўнік браслаўскай пракуратуры заявіў на сустрэчы з працоўным калектывам ДРБУ-142 у Браславе. Піша сайт braslav-star.by.

Ён сказаў, што шматдзетным сем'ям прадастаўлены дастаткова вялікія льготы ў плане будаўніцтва жылля, розных сацыяльных дапамог, мацярынскага капіталу ды іншыя. Таму, паводле яго слоў, дзяржава мае права патрабаваць з такіх бацькоў узаем і пэўнай адказнасці.

«Калі вы шматдзетныя і карыстаецеся ўсімі гэтымі льготамі, будзьце добрыя - належна выконвайце свае бацькоўскія абавязкі. За гэтым дзяржава і адпаведныя органы вельмі ўважліва сочаць», - сказаў пракурор. Ён звярнуў увагу, што ў практыцы абароны правоў і інтарэсаў непаўналетніх у раёне выпадкі аднаўлення бацькоўскіх правоў пасля іх пазбаўлення вельмі рэдкія. «Гэта вельмі складана, гэта практычна нерэальна, таму не даводзьце сітуацыю да таго моманту, калі дзяржорганы будуць змушаныя прыйсці і забраць дзяцей. Потым жа будуць спагнаны выдаткі, устаноўлены дакладны абавязак хадзіць на работу практычна без адпачынку і г.д. Таму бацькам трэба належным чынам планаваць дзяцей і тое, як іх забяспечваць, як выхоўваць і г.д. І дзяржава за гэтым паглядзіць. Паверце, паглядзіць», - адзначыў Юрый Кезік.

Пасля пракурор Браслаўшчыны дадаў, што "цацкацца" з такімі бацькамі яны не будуць.

Валянціна Асокіна