Рубрыка «Карта городских проблем» магла б змяшчаць шмат якія газетныя матэрыялы – прыкладам, толькі за апошнія два тыдні іх можна назваць некалькі: гэта артыкулы пра няякасную прыборку снега, пра тое, што ў горадзе змянілася растаноўка дарожных знакаў і парушэнне ПДР з боку бацькоў, якія няправільна паркуюцца каля школы, калі падвозяць сваіх дзяцей, пра дзікіх птушак, якія зімуюць на Лепельшчыне, і грамадзян, якія іх кормяць неадпаведнымі прадуктамі, пра стварэнне камісіі, без станоўчага рашэння якой у Лепелі могуць зачыніцца прыватныя фітнес-залы, ды і ўвогуле – ці мала нагодаў для крытычных матэрыялаў. А галоўнае – у гэтай рубрыцы можна было б паведамляць чытачам, як вырашана тая ці іншая гарадская праблема. Але тады давядзецца канстатаваць, што нейкія праблемы не вырашаюцца гадамі, а гэта б“е па аўтарытэце мясцовых уладаў...

Два месяцы таму ў газету «Лепельский край» прызначылі новую рэдактарку – Яну Міснік, якая змяніла на гэтай пасадзе шматгадовую кіраўніцу рэдакцыі Святлану Вазняк. Рубрыка «Карта городских проблем» як была пустой, так і застаецца. Ёсць рацыяналізатарская прапанова лепельскіх журналістаў: калі не ведаеце, што апублікаваць у гэтай рубрыцы, распытайце пра гэта сваіх чытачоў. Набярэце і фактуры на крытычныя артыкулы, і людзям дапаможаце, калі з дапамогай газеты нешта ў Лепелі павернецца да лепшага.

Ларыса Шчарбакова