Серада, 22 Жнівень 2018

У Віцебску пабудуюць футбольны манэж за 5,5 млн. рублёў – грамадзкае абмеркаваньне

Ацаніць гэты матэрыял
(2 галасоў)
Аналягічны футбольны манэж пабудаваны ў Горадні Аналягічны футбольны манэж пабудаваны ў Горадні

Ад 3-га да 27-га верасьня ў Віцебску пройдзе грамадзкае абмеркаваньне архітэктурна-пляніровачнай канцэпцыі эскізу будаўніцтва футбольнага манэжу дзіцяча-юнацкай школы ФК “Віцебск”. Манэж мяркуюць пабудаваць на праспэкце Люднікава ў раёне ЦСК “Віцебск”. Прыблізны кошт будаўніцтва – 5 млн. 547 тыс. рублёў.

Паводле перадпраектнай дакумэнтацыі, апублікаванай на сайце Віцебскага гарвыканкаму, крыніцамі фінансаваньня будуць сродкі самога ФК “Віцебск”, а таксама – сродкі гарадзкога бюджэту (з пазнакай – “часткова”).

Зьнясуць дамы, зьнішчаць дрэвы ля Віцьбы

Прыблізная сума будаўніцтва (5 млн. 547 тыс. рублёў) падаецца ў дакумэнтах без уліку выдаткаў на знос і адсяленьне жыхароў, таму выніковая лічба будзе яшчэ большая. Пад знос пойдуць два дамы па вуліцы Пугачова, 5 і 7 з гаспадарчымі забудовамі і садамі.  

Тэрыторыя пад будаўніцтва манэжу знаходзіцца ў водаахоўнай зоне ракі Віцьба. На сытуацыйнай схеме (глядзіце вышэй) бачна, што праектаваная плошча будаўніцтва накрывае зялёную зону ля Віцьбы. Колькі будзе зьнішчана дрэваў – не ўдакладняецца. Гаворыцца толькі пра кампэнсацыйныя выплаты і пасадкі.

Пачнуць будаваць у верасьні

Поўная назва праектаванага аб’екту – “Паветраапорны футбольны манэж дзіцяча-юнацкай школы футбольнага клюбу “Віцебск”. “Паветраапорны” – бо абалонка манэжу не прадугледжвае каркасу, паветра ўсярэдзіне будзе пастаянна нагнятацца пры дапамозе вэнтыляцыйных установак. Аналягічны футбольны манэж ужо дзейнічае ў Горадні.

 Усярэдзіне футбольнага манэжу (Горадня)

Паводле перадпраектнай дакумэнтацыі, віцебскі манэж канструкцыі славенскай фірмы “Дуол” будзе злучаны зь існым адміністрацыйна-бытавым корпусам ЦСК наземным пераходам. Прапускная здольнасьць манэжу – 300 чалавек за дзень, ён зойме, паводле праекту, 9375,16 квадратных мэтраў.

Будаўніцтва футбольнага манэжу для юных футбалістаў у Віцебску мяркуюць пачаць у верасьні 2018 году і скончыць праз 8,5 месяцаў. Меркаваны тэрмін эксплёатацыі аб’екту – 30 гадоў.

Заказчыкам будаўніцтва выступае прадпрыемства “Упраўленьне капітальнага будаўніцтва г. Віцебску”. Аўтар праекту – “Інстытут Віцебскграмадзянпраект”. Хто стане падраднай арганізацыяй, пакуль невядома.

Дзеля “падвышэньня значнасьці футболу”

“Мэта праекту – рэалізацыя праектных рашэньняў Генэральнага пляну. Асноўнай метай інвэставаньня дадзенага аб’екту ёсьць падвышэньне значнасьці футболу ў сфэры фізычнай культуры і спорту і рост ягонай папулярнасьці ў насельніцтва рэспублікі”, – гаворыцца ў паведамленьні Віцебскага гарвыканкаму.

Экспазыцыя графічных і тэкставых матэрыялаў будзе разьмешчаная ад 3-га да 18-га верасьня ў аддзеле архітэктуры і горадабудаўніцтва Віцебскага гарвыканкаму на трэцім паверсе будынку “УКБ гораду Віцебску” (вул. Шубіна, 5). Там жа можна будзе пакінуць свае заўвагі і прапановы наконт праекту. Іх таксама можна будзе накіраваць электроннай поштай на адрас Гэты адрас электроннай пошты абаронены ад спам-ботаў. У вас павінен быць уключаны JavaScript для прагляду. з пазнакай “грамадзкае абмеркаваньне”.

Нагадаем, грамадзкае абмеркаваньне будаўніцтва футбольнага манэжу ў Віцебску пачнецца 3 верасьня і працягнецца да 27 верасьня.   

Заўвагі і прапановы, атрыманыя ад удзельнікаў абмеркаваньня, будуць разгледжаныя на абласной архітэктурна-будаўнічай радзе не пазьней 11 кастрычніка 2018 году, абяцаюць арганізатары абмеркаваньня.

Зьміцер Міраш  

Залагініцца каб дадаць камэнтары