29 сакавіка выйшаў на волю актывіст  Свабоднага прафсаюза Беларускага Віктар Стукаў.. Яго затрымалі сілавікі 14 сакавіка ў Полацку з прымяненнем кайданоў.. Дома ў яго правялі  ператрус, забралі тэхніку і ўсе прадметы бел-чырвона-белага колеру. І спрабавалі запісаць з ім пакаяльнае відэа. Але ў сілавікоў нічога не атрымалася, бо актывіст спаслаўся на артыкул 27 Канстытуцыі і не стаў нічога гаварыць. Пасля яго завезлі ў Полацкі ІЧУ і на наступны дзень судзілі па частцы 2 артыкула 19.11 КаАП за лайк у сацыяльнай сетцы "Фэйсбук" матэрыяла з ютуб- канала "Радыё свабода". Хоць  прафсаюзны актывіст не прызнаў сваёй віны, але суддзя Уладзімір Бясецкі ўсё адно прысудзіў яму 15 сутак арышту.

Калі раней «народным» лічыўся артыкул 23.34 КаАП (пазней 24.23 КаАП), згодна з якім каралі за ўдзел у несанкцыянаваных масавых мерапрыемствах, то цяпер самая распаўсюджаная прычына трапіць у суд – гэта ч.2 арт. 19.11. Ужо каторы тыдзень усе раенныя суды Віцебску разбіраюць справы мясцовых жыхароў, затрыманых за падпіскі на «экстрэмісцкія» інтэрнэт-рэсурсы, суполкі і Тэлеграм-каналы. Караюць за гэта ў асноўным «суткамі», рэдка каму прысуджаюць штрафы. Відавочная мэта такога ціску: людзей запалохваюць карнымі захадамі, каб яны «адпісаліся» ад незалежных крыніц інфармацыі, а навіны шукалі ў тэлевізары або ў дзяржаўных СМІ.

Тэма Вялікай Айчыннай вайны стала дамінантнай у ідэалагічных кіраўнікоў. Па ўсей Віцебскай вобласці прайшлі імпрэзы да 80-х угодкаў спалення вескі Хатынь, якая яшчэ з савецкіх часоў лічыцца ўзорам зверстваў і катаванняў у дачыненні да жыхароў Беларусі.

Суд Наваполацка 8 лютага прызнаў выкладчыка Полацкага дзяржуніверсітэта Аляксандра Камка вінаватым у правядзенні пікету, і пастанавіў падвергнуць адміністрацыйнаму спагнанню ў выглядзе штрафу ў памеры 3700 рублёў.