Пятніца, 08 Сакавік 2019

“У нашай мэдыцыны – жаночы твар”. У Віцебску адкрылі новую паліклініку - фота

Ацаніць гэты матэрыял
(16 галасоў)
Фота: С. Горкі Фота: С. Горкі

У віцебскім мікрараёне “Поўдзень-7” урачыста адкрылі новы і доўгачаканы паліклінічны цэнтар. На адкрыцьцё паліклінікі ў Віцебск прыехаў прэм’ер-міністар Сяргей Румас. Імпрэза адбылася 7 сакавіка. Паліклініку будавалі 12 гадоў...

Ва ўрачыстасьці бралі ўдзел старшыня Віцебскага аблвыканкаму Мікалай Шарстнёў, начальнік галоўнага ўпраўленьня аховы здароўя аблвыканкаму Юры Дзяркач, мэр гораду Віктар Нікалайкін ды іншыя.

Мікалай Шарстнёў распавёў пра цяжкасьці, зьвязаныя з будаўніцтвам паліклінічнага комплексу, і дзякаваў прэм'ер-міністру за дапамогу ў фінансаваньні (будучы старшынём праўленьня “Банку разьвіцьця РБ”, Румас паспрыяў у выдзяленьні сродкаў на будоўлю). Але, як было агучана, асноўнае фінансаваньне будоўлі адбывалася з абласнога ды гарадзкога бюджэтаў. Працы выконваў будаўнічы трэст №9.

Падчас імпрэзы. Сяргей Румас - у цэнтры, Мікалай Шарстнёў - справа.

Сяргей Румас, у сваю чаргу, зазначыў, што “нам трэба больш клапаціцца пра сваё здароўе”, ды павіншаваў жанчын з надыходзячым сьвятам.

“Відавочна, што ў нашай мэдыцыны –  жаночы твар, таму сымбалічна, што такі прыгожы сучасны аб'ект мы адчыняем напярэдадні Міжнароднага жаночага дня”, – заўважыў прэм’ер-міністар.

Віцяблянкі на адкрыцьці паліклінікі

Галоўны ўрач новай паліклінікі Станіслаў Цітовіч выказаў падзяку “за цудоўны падарунак” кіраўніцтву краіны, вобласьці і гораду. Паабяцаў, што мэдыкі будуць цяпер працаваць яшчэ з большым энтузіязмам.

Сымбалічны ключ ад паліклінікі перадаў галоўнаму ўрачу ўстановы гендырэктар будтрэсту №9 Уладзімер Леньчыкаў.

Сымбалічны ключ у руках галоўнага ўрача паліклінікі

Чырвоную стужку разрэзалі Сяргей Румас, Мікалай Шарстнёў, Віктар Нікалайкін і Станіслаў Цітовіч. Прысутныя на імпрэзе патэнцыйныя пацыенты сустрэлі адкрыцьцё воплескамі.

Пасьля таго, як стужку перарэзалі, народ пасунуўся да ўваходу ў новую паліклініку. Але людзей усярэдзіну не пусьцілі – параілі прыходзіць у наступны панядзелак, калі паліклініка пачне працаваць.

Нагадаем, будаўніцтва паліклінікі ў мікрараёне “Поўдзень-7” у Віцебску пачалося  яшчэ ў 2007 годзе, але затым будоўлю на доўгі час “замарозілі”. Як лічаць грамадзкія актывісты, у тым, што паліклініку нарэшце дабудавалі, ёсьць і іхняя заслуга.

Севярынец: Каб хто ведаў, колькі мы грукаліся ў розныя дзьверы…

“Калі мы ў 2014 годзе бегалі наконт будаўніцтва паліклінікі ў Білеве, я ўжо ведала пра гэтую паліклініку. Тады на “замарожанай” будоўлі не было нават першага паверху. За будаўніцтва паліклінікі ў Білеве мы прынесьлі 4756 подпісаў. Нам сказалі, што спачатку дабудуюць тут, а потым ужо будуць думаць пра Білева”, – расказвае віцебская актывістка Тацяна Севярынец.  

“У 2016-м мы зноў прыйшлі да гарадзкіх уладаў з подпісамі за пабудову ўжо паліклінікі на “Поўдзень-7”. Паказалі, што ёсьць вялікія праблемы, прынесьлі 1600 подпісаў, і неўзабаве яны пачалі дабудоўваць. Але давялі да 2-га паверху, і грошы скончыліся. Мы зноў да іх з пытаньнем: “Калі працягнецца будаўніцтва?”… Каб хто ведаў, колькі разоў мы грукаліся ў розныя дзьверы з гэтай нагоды!.. Але пабудавалі і добра, абы людзям было зручна”, – падсумавала Тацяна.

  

С. Горкі, фота аўтара

Залагініцца каб дадаць камэнтары