Як будзе забясьпечаная ахова парадку падчас чарговага фэстывалю мастацтваў «Славянскі базар у Віцебску», які адкрываецца на наступным тыдні ў Віцебску, — распавёў начальнік Віцебскай міліцыі Ігар Яўсееў: «Забясьпечваць ахову парадку будуць каля 600 супрацоўнікаў міліцыі і ваеннаслужачых унутраных войскаў. Для ўзмацненьня сіл Віцебскага гарнізону міліцыі будуць запрошаныя калегі з Гарадзенскай, Гомельскай і Менскай абласьцей».

У сувязі з захворваньнем сьвіней прыпынены экспарт сьвініны з тэрыторыі Віцебскай вобласьці. Гэткае рашэньне ўтрымліваецца ва ўказаньні № 02/2526 ад 1 ліпеня 2013 году, апублікаваным на сайце дэпартамэнту вэтэрынарнага і харчовага нагляду Міністэрства сельскай гаспадаркі і харчаваньня.

Недалёка ад Віцебску на сьвінакомплексе побач зь вёскай Копці паводле слоў мясцовых жыхароў зьнішчаюць усё пагалоўе сьвіней у сувязі з успышкай афрыканскай чумы сьвіней. Крыніца ў Віцебскім райвыканкаме паведаміла, што падрыхтоўка да мерапрыемства па ліквідацыі сьвіней распачалася яшчэ перад выходнымі. Першапачаткова для гэтага меркавалася прыцягнуць супрацоўнікаў устаноў культуры раёну - жанчыны мусілі забіваць жывёл, а мужчыны грузіць, але пазьней ад гэтай ідэі адмовіліся. Магчыма нават, што замест работнікаў культуры зараз задзейнічаныя вайскоўцы.

За замах на ўстанаўленьне кантакту з супрацоўнікам замежнай спэцслужбы без прыкметаў здрады Радзіме рашэньнем Віцебскага абласнога суду Андрэй Гайдукоў прысуджаны да аднаго з паловай гадоў калёніі агульнага рэжыму. Асудзілі яго паводле артыкулу 356-1 крымінальнага кодэксу (устанаўленьне супрацоўніцтва са спэцыяльнай службай, ворганам бясьпекі або разьведвальным ворганам замежнай дзяржавы). Як пракамэнтавалі прадстаўнікі Праваабарончага цэнтру “Вясна”, гэты артыкул быў уключаны ў крымінальны кодэкс у лістападзе пазамінулага году і носіць вельмі расплывісты характар.