«У час пік аўтобусы перапоўнены, што стварае небяспечныя ўмовы падчас руху, павялічвае рызыку траўмавання, стварае дыскамфорт для пасажыраў. Недахоп рэйсавых аўтобусаў вядзе да таго, што людзі могуць атрымаць цеплавы ўдар, асабліва ў летні перыяд. Людзі вымушаны ехаць у небяспечных умовах, у тым ліку пасажыры сталага веку і дзеці», -- гаворыцца ў звароце на імя старшыні Наваполацкага гарвыканкама Ігара Бурмістрава.

Нямала незадавальнення наконт «шасцёркі» можна знайсці і ў сацыяльных сетках. Прыкладам, «ВКонтакте» у групе «Жалоба. Полоцк.Новополоцк» інтэрнэт- карыстальнікі звяртаюць увагу і на тое, што па гэтым маршруце добра наладжаны рух прыватных «маршрутак». І выказваюць меркаванне, што гэтая з'ява мае карупцыйны змест, - што па 6-м маршруце вельмі выгадна «пускаць прыватнікаў», бо пасажырапаток вялікі, а аўтобусы ходзяць рэдка.

Насамрэч, раніцай і надвячоракам №6 ходзіць раз на 40 хвілін, удзень і вечарам – радзей. З гэтай нагоды мясцовыя жыхары напісалі нямала скаргаў на мясцовы аўтапарк. Да прыкладу, на інтэрнэт-рэсурсе www.spr.by наконт працы аўтапарка сёлета размешчаны выключна негатыўныя водгукі. Апошнія падзякі работнікам транспартнай установы датуюцца мінулым годам, а ў гэтым годзе ўсе допісы – выключна адмоўнага зместу. І рэакцыі з боку кіраўніцтва на іх няма аніякай.

Павел Гарадзецкі