Серада, 04 Студзень 2023

Мікалай Статкевіч паведаміў пра праблемы з ліставаннем

Ацаніць гэты матэрыял
(0 галасоў)
Мікалай Статкевіч паведаміў пра праблемы з ліставаннем

У чарговым лісце да жонкі, Марыны Адамовіч, палітвязень напісаў з глыбоцкай калоніі №23, што яму не аддаюць лісты з волі. Пра гэта спадарыня Марына паведаміла ў Фэйсбуку, і тут жа ў каментарах азваліся людзі, якія пісалі да Мікалая Статкевіча. Адказу яны не атрымлі, дый лісты з паштоўкамі ад сяброў ды знаёмых таксама не трапілі да зняволенага. «Лістоў ад іншых людзей няма, відавочна, іх не прапусцяць. Але падзякуй ад мяне усіх, хто спрабаваў павіншаваць мяне, хто маліўся за нас. Мае калядныя віншаванні ўсім ім. А таксама каляднае пажаданне людзям нашай і суседніх краін – «Міра і волі!»–цытуе жонка ліст ад Мікалая Статкевіча.

Гэтага ліста Марыне Адамовіч давялося чакаць досыць працяглы час, бо палітвязень з 20.12 па 29.12 знаходзіўся ў ШІЗА. Пасля пераводу ў Глыбокае, з 23 чэрвеня 2022г., яго кідалі ў ШІЗА больш як 20 разоў, і ці не палову часу, адбытага у калоніі, ён быў вымушаны правесці ў цеснай камеры штрафнога ізалятара. Адміністрацыя калоніі амаль адразу ж паставіла зняволенага апазіцыйнага палітыка на ўлік як «асобу, схільную да экстрэмізму», і шукае любыя падставы, каб пакараць яго найбольш сувора.

Мікалай Статкевіч быў затрыманы 31 траўня 2020г. Апазіцыянера прызналі вінаватым паводле ч. 1 арт. 293 Крымінальнага кодэкса («Арганізацыя масавых беспарадкаў»), і 14 снежня 2021г. ён быў асуджаны да 14 гадоў пазбаўлення волі ў калоніі ва ўмовах асаблівага рэжыму.

Феліцыян Красоўскі

 

Апублікавана ў Палітвязьні
Тэгі:
Яшчэ ў гэтым разьдзеле: « Сёння - дзень нараджэння Паўла Севярынца. Палітвязню споўнілася 46 гадоў Палітзняволены Арцём Латышаў: «Усё жыццё я стараўся быць сумленным і справядлівым» »
Вярнуцца ў пачатак