«Гэтыя выбары ўсіх маіх адрасантаў выбілі зь сядла. Шчыра спачуваю ім. Разумею, як цяжка вытрымаць трохмесячны выбарчы маратон – як у якасьці кандыдатаў, так і назіральнікаў на выбарчых участках», – выказвае сваё разуменьне сытуацыі ў краіне Міхаіл Жамчужны.
«Так, сапраўды, палітвязень Жамчужны неаднаразова паведамляў мне ў лістах пра тое, што інтэнсіўнасьць ліставаньня з грамадзянскімі актывістамі заўважна паменшылася. Цяпер лісты з волі, са словаў Міхаіла, сталі «на вагу золата». Цяпер яны прыходзяць радзей, кола падтрымкі і ўвагі грамадзкасьці да зьняволенага звузілася», – мяркуе праваабаронца зь Віцебску Леанід Сьвецік.
Апошнім часам у Жамчужнага зьявіліся праблемы з падачай скаргаў у суды. Фактычна адміністрацыя калёніі пазбавіла палітвязьня канстытуцыйнага права на абарону.
«Цяпер блякуюць маю перапіску з судамі, патрабуючы даклейваць марку за 5 капеек. Заявы вяртаюць, тэрміны абскарджаньня канчаюцца, і рашэньні набываюць законную моц. А гэтую марку мне ўзяць няма дзе! Сытуацыя бязвыхадная…» – паведамляе ў лісьце палітвязень.
Жамчужны лічыць, што такія абмежаваньні зьвязаныя з тым, што ён выпрацаваў правільную стратэгію абароны ў судах.
Палітвязень высока ацэньвае працу ўсіх праваабаронцаў, бо ад 2014 году аніводны грамадзянскі альбо палітычны актывіст ня быў асуджаны на зьняволеньне.
«Я, знаходзячыся ў месцах пазбаўленьня волі і супрацоўнічаючы з праваабаронцамі ад жніўня 2014 году, перасьледаваў адзіную мэту – каб палітвязьняў у Беларусі больш не было», – піша Міхаіл Жамчужны.
У апошнія дні сьнежня, перад чарговай пасадкай у ШІЗА, Міхаіл Жамчужны пасьпяшаўся павіншаваць усіх прадстаўнікоў грамадзянскай супольнасьці Беларусі з цудоўнымі зімовымі сьвятамі: «Жадаю ўсім здароўя! Жыве Беларусь!»
Лявон Яфрэменка