Аўторак, 23 Студзень 2018

У Віцебску жанілі Цярэшку

Ацаніць гэты матэрыял
(1 голас)

Жаніцьба Цярэшкі – старадаўняя народная гульня, якая, як мяркуецца, паўстала на Лепельшчыне. Асноўнай яе мэтай было пазнаёміць бясшлюбную моладзь, дапамагчы ёй прымераць на сябе ролю жанатага чалавека. Раней абрадавая гульня, якая праходзіла традыцыйна ноччу на сьвяткі, была вядомая сярод сялянскай моладзі. Але зь нядаўніх часоў яна «прапісалася» на сталай аснове і ў абласным цэнтры.

Гэтым разам месцам гульні быў абраны бар «Торвальд», дзе сабралася больш за 20 ахвотных «ажаніцца». Некаторыя хлопцы і дзяўчаты былі апранутыя ў нацыянальнае адзеньне.

Па традыцыі перад пачаткам падрыхтоўваюць сьвяточны стол з выпіўкай і закускай. Пасьля гэтага пачынаюцца розныя жартоўныя гульні і вясёлыя танцы, мэта якіх – пазнаёміць паміж сабой людзей і, магчыма, скласьці пары, якія ў далейшым і пабяруцца шлюбам.

«Цяцерка», «Бабыль», «Падушачка» – гэта гульні, назвы якіх нічога ня скажуць сучаснаму чалавеку. Але толькі ня тым, хто арганізуе і ладзіць Жаніцьбу Цярэшкі. Для іх правядзеньне гэтых старадаўніх нацыянальных гульняў зьяўляецца важнай часткай.

Кульмінацыяй усёй дзеі стала імправізаванае вясельле. Напачатку вызначыліся бацькі – тыя, хто жэняць сваіх дзяцей. Затым яны склалі сьпісы патэнцыйных жаніхоў і нявестаў і вызначылі пары. Пасьля жаніцьбы пары ўжо мусілі не разлучацца аж да канца сустрэчы.

Цягам ўсяго «вясельля» хлопцы і дзяўчаты танчылі беларускія народныя танцы «Верабей» і «Лявоніху», украінскі народны танец «Гапак», а таксама чэскую «Польку», польскі «Кракавяк» ды іншыя.

Усе танцы і гульні прайшлі пад жывую музыку – у распараджэньні лепельскага музыкі Васіля Шкіндзера была скрыпка, беларуская дуда і жалейка.

Розныя этнафэсты, квэсты і гістарычныя рэканструкцыі становяцца ўсё больш папулярнымі сярод моладзі. Удзел у іх дазваляе ня толькі паглынуцца ў атмасфэру даўно мінулых дзён але і дае магчымасьць адчуць сябе ў новым вобразе. Вось і Жаніцьба Цярэшкі набірае ўсё большую папулярнасьць.

Уладзімер Бяляўскі

Залагініцца каб дадаць камэнтары