Выканаўца наведаў Віцебск неўзабаве пасьля падобнай прэзэнтацыі ў Горадні.

Паводле словаў артыста, ён не чакаў, што зьбярэцца гэтулькі людзей, таму далёкая дарога, якую ён пераадолеў з другога канца Беларусі, была вартая таго. Людзей і напраўду сабралася багата – крэслаў хапіла ня ўсім, таму тым, хто спазьніўся, давялося стаяць у праходзе.

Падчас канцэрту перад слухачамі ў яркіх вобразах разгарнулася ўся гісторыя краіны – ад  узьнікненьня Вялікага Княства Літоўскага і да падзеяў 20 стагодзьдзя.

Перад выкананьнем кожнай песьні артыст рабіў невялікі экскурс у гісторыю Беларусі і распавядаў пра кантэкст сюжэту твору. Шмат каму цікава было пачуць пра заснаваньне гарадоў, пра падзеі Паўночнай вайны і паўстаньня Каліноўскага, а таксама даведацца нешта новае пра такіх вядомых беларускіх дзеячоў як Панятоўскі, Міцкевіч, Багдановіч, Тарашкевіч.

На канцэрце прагучалі як песьні з новага альбому, гэтак і ўжо шырока вядомыя і любімыя гіты з рэпэртуару гурту Dzieciuki.

Напрыканцы сустрэчы слухачы маглі набыць кампакт-дыскі з запісам новага альбому і на жаданьне атрымаць аўтограф артыста.

А самыя адданыя прыхільнікі не прапусьцілі магчымасьці зрабіць сэлфі зь ўлюбёным выканаўцам.

Уладзімер Бяляўскі