Серада, 30 Студзень 2019

Першая канфэрэнцыя TEDxVitebsk. Як гэта было

Ацаніць гэты матэрыял
(2 галасоў)

26 студзеня ў Арт-прасторы VZAP адбылася першая ў гісторыі Віцебску канфэрэнцыя TEDxVitebsk у фармаце і на ўмовах ліцэнзіі сусьветна вядомага праекту TED (Technology Entertainment Design (тэхналёгіі, забавы, дызайн).

Жывыя канфэрэнцыі ТЕDx прапануюць відэатрансьляцыі, запісы выступаў, перакладзеныя больш як на 100 моваў, адукацыйныя лекцыі выкладчыкаў ВНУ, інкубатар ідэяў, а таксама шмат цікавых праектаў і ініцыятываў, якія выкарыстоўваюць сілу ідэі.

Канфэрэнцыю ў Віцебску наведалі каля ста чалавек. У асноўным гэта былі навучэнцы і студэнты навучальных установаў абласнога цэнтру.

Наведвальнікі канфэрэнцыі ўбачылі і пачулі дзесяць кароткіх выступаў сьпікераў – адмыслоўцаў у розных абласьцях дзейнасьці чалавека. Гэта інфармацыйныя тэхналёгіі, юрыспрудэнцыя, урбаністыка, мастацтва, гісторыя, адукацыя, псыхалёгія і асабістае разьвіцьцё.

Прамаўляе Дзяніс Бярозка, старшы выкладчык катэдры грамадзянскага права і грамадзянскага працэсу, куратар юрыдычнай клінікі Віцебскага дзяржаўнага ўнівэрсытэту імя Машэрава.

У ролі дакладчыкаў на канфэрэнцыі выступілі вядомыя ў Віцебску людзі, а таксама госьці зь беларускай сталіцы. Апроч слуханьня іх прамоваў, прысутныя змаглі атрымаць асалоду ад музыкі, паўдзельнічаць у розных віктарынах.

Асаблівую ўвагу наведвальнікаў імпрэзы прыцягнула стварэньне з дапамогай 3D-друкаркі розных вырабаў, у тым ліку сувэніраў і цацак. Гэтую частку праграмы забясьпечыла віцебская адукацыйная пляцоўка «Робавіта».

Прысутныя высока ацанілі якасьць выступаў запрошаных лектараў і добрую арганізацыю мерапрыемства з боку работнікаў і валянтэраў арт-прасторы VZAP.

Л. Сьвецік

Залагініцца каб дадаць камэнтары