Нпярэдадні дзеля выкладаньня сваёй пазыцыі спадар Ян адмыслова сустрэўся са старшынём Мазалаўскага сельскага савету Леанідам Дубінай. Падчас сустрэчы ён мусіў давесьці да старшыні інфармацыю наконт гэтай праблемы і ўзгадніць агульныя дзеяньні, скіраваныя на захаваньне гістарычнай памяці. Таксама ён спадзяваўся, што сельскі савет дасьць дазвол на ўпарадкаваньне тэрыторыі вакол раскапаных марадэрамі магілаў, ды паспрыяе ў выкананьні ўсіх фармальных акалічнасьцяў.
Але, як той казаў, паразуменьня дасягнуць не ўдалося. Спачатку кіраўнік заявіў, што гэта не ўваходзіць у ягоную кампэтэнцыю. А пасьля пераконваў у тым, што перш чым даць такі дазвол, ён мусіць пракансультавацца з ідэалягічным аддзелам райвыканкаму і ўзгадніць свае дзеяньні з вышэйшым кіраўніцтвам. Апроч таго, настойваў на тым, што знойдзеныя парэшткі могуць належыць каму заўгодна, пачынаючы ад ахвяраў фашызму і аж да грамадзян, расстраляных ужо ў пасьляваенны час па сьмяротным прысудзе – маўляў, ніхто ж ня ведае месцаў гэткіх пахаваньняў, нават сваякі. Расповеды ж сьведкаў зь вёсак Хайсы і Дрыкольле, на якія спасылаўся Ян Дзяржаўцаў, адмаўляліся і называліся фальсыфікацыяй.
Падалося, што грамадзкая ініцыятыва захраснула косткай горле прадстаўніка мясцовай улады. Сустрэча скончылася безвынікова, і Ян Дзяржаўцаў, улічваючы прамаруджваньне мэдычнай экспэртызы знойдзеных парэшткаў, якая цягнецца ўжо некалькі месяцаў, вырашыў усталяваць крыжы без дазволу.
Паводле Яна Дзяржаўцава, у яго склалася ўражаньне, нібыта ўлады адмыслова ня хочуць публічна прызнаваць факту існаваньня ў лесе пад вёскай Хайсы месца масавых расстрэлаў савецкіх грамадзян органамі НКУС у сярэдзіне трыццатых гадоў мінулага стагодзьдзя. Усталяваньне крыжоў, на думку актывіста, мусіла прыцягнуць увагу грамадзкасьці да месца масавых пахаваньняў незаконна рэпрэсаваных грамадзян.
Нягледзячы на дрэннае надвор’е, з раніцы актывісты рушылі ў бок вёскі Хайсы. На выезьдзе з гораду аўтамабіль, у якім знаходзіўся Ян Дзяржаўцаў, пачаў суправаджаць легкавік ДАІ. Пасьля таго, як машына з актывістамі спынілася, супрацоўнікі ДАІ запатрабавалі суправаджальныя дакумэнты на вырабленыя крыжы. Спадар Ян заявіў, што крыжы ён зрабіў сам, і таму ніякіх дакумэнтаў быць ня можа. Гэткі адказ даішнікаў не задаволіў, і вельмі хутка да іх пад’ехалі некалькі машын зь міліцыянтамі і людзьмі ў цывільным. На месца затрыманьня прыехаў таксама і старшыня Мазалаўскага сельсавету Леанід Дубіна разам з прадстаўніком лясгасу.
Звонку ўсе гэтыя дзеяньні нагадвалі загадзя сплянаваную апэрацыю з вонкавым назіраньнем, праслухоўваньнем тэлефонаў і іншымі атрыбутамі, вядомымі з дрэнных фільмаў адпаведнай тэматыкі, дзе ўвесь сюжэт сшыты белымі ніткамі, і зь лёгкасьцю прачытваецца фінал.
Яна Дзяржаўцава разам з кіроўцам даставілі ў РАУС Віцебскага раёну, дзе ўзялі пісьмовыя тлумачэньні па сутнасьці справы. Пратрымаўшы грамадзян у пастарунку блізу трох гадзін, міліцыянты заявілі, што зь іхняга боку да затрыманых няма аніякіх прэтэнзіяў, пасьля чаго адпусьцілі.