18 траўня а 5:30 раніцы неўздалёк ад Віцебскага абласнога суду затрымалі жонку Сяргея Каваленкі Алену, ягонага стрыечнага брата Кастуся Чарнова і актывістку “Эўрапейскай Беларусі” Алену Семенчукову. Згодна з пратаколам, затрыманых вінавацілі ў дробным хуліганстве. Яны нібыта “парушалі грамадзкі спакой пры дапамозе аэразольнага балёнчыка і трафарэту”. Цягам шасьці гадзін іх трымалі спачатку ў Кастрычніцкім РАУС, а потым у пункце аховы правапарадку на вуліцы Чэхава ў Віцебску. У Кастрычніцкі суд затрыманых прывезьлі а палове на 12-ю.

18 траўня Віцебскі абласны суд не задаволіў касацыйную скаргу Сяргея Каваленкі на рашэньне Першамайскага райсуду, які прысудзіў актывісту 2 гады і 1 месяц зьняволеньня. У залю суду, якая была запоўненая пераапранутымі супрацоўнікамі міліцыі, пусьцілі толькі выканаўцу абавязкаў старшыні Кансэрватыўна-хрысьціянскай партыі БНФ на Беларусі Юрася Беленькага, адказнага сакратара ўправы партыі Алеся Чахольскага, а таксама бацьку Сяргея.

Юлія Вінаходава - актывістка ”Маладога Фронту” і студэнтка Віцебскага дзяржаўнага тэхналягічнага каледжу. Апошні курс, 26 чэрвеня - дзяржэкзамэн. Раней зь дзяўчынай гутарылі куратар і намесьнік дырэктара па выхаваўчай працы каледжу. 17 траўня затэлефанавалі ейнай маці. Сказалі прыйсьці ў каледж на размову. Дзяўчына затэлефанавала куратару, каб высьветліць, у чым справа. Тая адказала, што Юля “даскакалася”, бо яе прасілі нічога не рабіць, а яна не паслухалася, сказалі пра ўдзел у пікеце каля СІЗА.

Віцебская міліцыя працягвае шукаць таго, хто 4 траўня ўзьняў бел-чырвона-белы сьцяг над будынкам інтэрнату мэдычнага ўнівэрсытэту. Дзеля гэтага 11 траўня ў інспэкцыю па справах непаўнагадовых Кастрычніцкага раёну Віцебску была выкліканая актывістка “Эўрапейскай Беларусі” Алена Семенчукова. Капітан міліцыі Валер Вашкель падчас гутаркі зь дзяўчынай дапытваўся, што яна і яе непаўнагадовы брат Сяргей рабілі ля таго месца, дзе было вывешанае, паводле яго выразу, “бела-чырвонае палотнішча”.

Сяргей Каваленка аднавіў галадоўку яшчэ 8 траўня - у той самы дзень, калі яго этапавалі ў віцебскі СІЗА з Валадаркі. Пра гэта паведаміла жонка палітвязьня Алена Каваленка. Узнаўляючы галадоўку, Сяргей патрабуе вызваленьня усіх палітвязьняў, свабоднага выкарыстаньня нацыянальнай сымболікі, справядлівага і незалежнага суду.

7 траўня прадпрымальніца Ірына Яскевіч наведала інспэкцыю па падатках і зборах Першамайскага раёну Віцебску. Падаткавікі патрабуюць ад яе дэклярацыю аб даходах за апошнія 10 гадоў. Такое самае патрабаваньне супрацоўнікі падатковай інспэкцыі выставілі і сыну прадпрымальніцы. “Ад мяне запатрабавалі дэклярацыю аб даходах за пэрыяд з 2003 году, - распавядае Ірына Яскевіч. - Кажуць, маўляў, мае прыбыткі не пакрываюць выдаткаў. Цяпер я мушу зьбіраць патрэбныя дакумэнты”.

Вельмі зьдзівіўся віцебскі сябра КХП-БНФ Ян Дзяржаўцаў, знайшоўшы ў сваёй паштовай скрыні капэрту з адваротным адрасам адміністрацыі прэзыдэнта Рэспублікі Беларусь. Палітык не паверыў сваім вачам, калі расьпячатаў капэрту і прачытаў у першых радкох ліста, які быў унутры, што гэты ліст зьяўляецца адказам на ягоную скаргу. Бо літаральна некалькімі днямі раней актывіст ужо атрымліваў ліст з адміністрацыі прэзыдэнта ў адказ на тую самую скаргу. Зьмест абодвух лістоў значна адрозьніваецца адзін ад другога.

Віцебскі апазыцыянэр, актывіст Кансэрватыўна-хрысьціянскай партыі - БНФ Сяргей Каваленка этапаваны зь СІЗА № 1 на вул. Валадарскага ў Менску ў віцебскі сьледчы ізалятар № 2. Пра гэта паведаміла ягоная жонка Алена Каваленка. “Толькі 7 траўня стала вядома, што ён можа быць адпраўлены ў СІЗА № 2 Віцебску, а сёньня ён ужо там. Сёньня зь ім паспрабуе сустрэцца адвакат. Мяне турбуе, што яго этапавалі ў тое месца, дзе ён трымаў галадоўку першыя два месяцы зьняволеньня”, - сказала Алена Каваленка. Нагадаем, у віцебскім СІЗА, як раней заяўляла жонка Каваленкі, на яго аказваўся ціск, які можна лічыць катаваньнямі.

Больш як чатыры гады спатрэбілася віцебскаму актывісту Сяргею Белязеку на тое, каб дамагчыся абароны сваіх правоў. Менавіта столькі часу разглядаў ягоную скаргу на дзеяньні міліцыянтаў і пастанову суду Камітэт ААН па правох чалавеку. Вынік разгляду: прызнана, што дзяржава парушыла правы актывіста на мірныя сходы і публічнае выказваньне думак. Згодна з прынятым рашэньнем, беларускія ўлады абавязаныя забясьпечыць спадара Белязеку эфэктыўнымі сродкамі прававой абароны і кампэнсаваць панесеную ім шкоду.

Актывісты кампаніі “Рэвалюцыя праз сацыяльныя сеткі” адзначылі сьвята працы - 1 мая. У гэты дзень у Полацку і Наваполацку зьявіліся расьцяжкі, вывешаныя актывістамі. Тэксты, што былі напісаныя на расьцяжках: “Не дыктатуры!” і “Ня МАЙся пад дыктатурай!”.

1 траўня ў Менску з прапановы былога кандыдата ў прэзыдэнты Дзьмітрыя Вуса была створаная ініцыятыўная група па падрыхтоўцы законапраекту аб унясеньні зьменаў ў Выбарчы кодэкс Рэспублікі Беларусь. Гэтыя зьмены паспрыяюць таму, каб выбары ў краіне сталі сумленнымі і справядлівымі.

2 траўня палітвязьня Сяргея Каваленку этапавалі з Рэспубліканскага псыхіятрычнага шпіталю ў Навінках у менскі сьледчы ізалятар на вуліцы Валадарскага. Пра гэта паведаміла ягоная жонка Алена са спасылкай на лекара шпіталю. Пра вынікі псыхіятрычнай экспэртызы, якую Сяргей Каваленка праходзіў у Навінках, лекар не паведаміў, але жанчына мяркуе, што яны будуць адмоўныя, і яе мужа неўзабаве могуць накіраваць для адбыцьця пакараньня ў адну з калёніяў.

На 26-я ўгодкі аварыі на Чарнобыльскай АЭС Віцебская грамадзкасьць — ліквідатары аварыі і дэмакратычныя актывісты — сабраліся каля Крыжа Эўфрасіньні Полацкай на Ўсьпенскай горцы. Пасьля кароткіх прамоваў і ўспамінаў удзельнікаў ліквідацыі наступстваў аварыі ў Чарнобылі прысутныя спусьціліся на бераг Заходняй Дзьвіны і пусьцілі па вадзе жалобны «Вянок памяці». Гэта ўжо традыцыйная штогадовая жалобная акцыя да ўгодкаў чарнобыльскай трагедыі, якая праводзіцца ў Віцебску.

Адстойваючы сваё права на атрыманьне адказаў ад чыноўнікаў на беларускай мове, віцебскі лідэр КХП БНФ Ян Дзяржаўцаў дайшоў ужо да адміністрацыі прэзыдэнта. Гэткае права забясьпечваецца артыкулам 18 Закону Рэспублікі Беларусь «Аб зваротах грамадзян і юрыдычных асоб», дзе абвяшчаецца: «Пісьмовыя адказы на пісьмовыя звароты афармляюцца на мове звароту». Закон уступіў у сілу 22 студзеня 2012 году, і пакуль ня ўсе чыноўнікі выконваюць яго палажэньні.

Актывіст кампаніі «Гавары праўду» з Гарадка Леанід Аўтухоў атрымаў адказ з райвыканкаму за подпісам намесьніка старшыні Буруновай Н. А. «Зварот быў накіраваны, каб атрымаць дазвол на правядзеньне пікетаваньня з нагоды 26-й гадавіны аварыі на Чарнобыльскай АЭС, — паведаміў актывіст. — У звароце я прасіў, каб, калі будзе прымацца рашэньне, запрасілі на абмеркаваньне і мяне. Але чыноўнікі ўсё вырашылі самі, адказалі: “Не”. І як пасьля гэтага грамадзяне могуць ставіцца да кіруючай ўлады?!».