Субота, 04 Студзень 2020

У Віцебску будуць судзіць Тацяну Севярынец – за ўдзел у акцыях за незалежнасьць

Ацаніць гэты матэрыял
(2 галасоў)
Тацяна Севярынец падчас акцыі. Фота: facebook.com Тацяна Севярынец падчас акцыі. Фота: facebook.com

У чацьвер 9 студзеня суд Першамайскага раёну Віцебску мае разгледзець два адміністрацыйныя пратаколы, складзеныя ў дачыненьні да актывісткі БХД Тацяны Севярынец за парушэньне заканадаўства аб масавых мерапрыемствах (ч.1 арт. 23.34 КаАП). Актывістку будуць судзіць за ўдзел у акцыях за незалежнасьць, якія адбыліся 20 і 21 сьнежня ў Менску.

«09 студзеня суд Першамайскага раёну хоча разгледзець адміністрацыйную справу ў дачыненьні да мяне па 23.34 ч.1. Два пратаколы! Падзеі жыцьця ў Новым годзе пачынаюцца з судоў», – напісала на сваёй старонцы ў Facebook Тацяна Севярынец.

Спадарыня Тацяна ўдакладніла «Віцебская Вясьне», што пратаколы былі складзеныя за ўдзел у менскіх акцыях за незалежнасьць, якія прайшлі 20 і 21 сьнежня.

Судовае паседжаньне ў Віцебску (суд Першамайскага раёну) заплянаванае на 9 сьнежня, пачатак – у 09.10 гадзінаў. Але актывістка ня пэўная, ці будзе ў гэты дзень у Віцебску, бо зьбіраецца ў Менск, каб падтрымаць сям’ю сына – палітыка Паўла Севярынца, які 26 сьнежня быў прысуджаны да 15 сутак адміністрацыйнага арышту.

Тацяна Севярынец не выключае, што і яе могуць пакараць «суткамі».

Раней позвы ў суд за ўдзел у менскіх акцыях супраць інтэграцыі з Расеяй атрымала актывістка і блогерка Алена Янушкоўская.

Артыкул 23.34 (ч.1) прадугледжвае пакараньне ў выглядзе штрафу да 30 базавых велічынь або адміністрацыйны арышт.

Зьміцер Міраш

 

Камэнтуйце гэтую навіну на нашай старонцы ў facebook!

Чытайце таксама навіны “Віцебскай Вясны” ў Telegram.