Пятніца, 23 Лістапад 2018

Абласны суд пакінуў у сіле штраф актывісту свабоднага прафсаюзу

Ацаніць гэты матэрыял
(5 галасоў)
Віктар Стукаў Віктар Стукаў

Віцебскі абласны суд 21 лістапада прызнаў прафсаюзнага актывіста з Полацку Віктара Стукава вінаватым у перашкодзе дзейнасьці вэтэранскай арганізацыі ААТ «Полацак-Шкловалакно». Судзьдзя Ірына Смалякова, аднаасобна разгледзеўшы скаргу актывіста, вырашыла пакінуць ранейшую пастанову Полацкага суду ў сіле. Прафсаюзьнік павінен выплаціць штраф у 7 базавых на працягу месяца.

Віктар Стукаў ў сваёй скарзе адзначыў, што суд Полацкага раёну і гораду Полацку дасьледаваў матэрыялы адміністрацыйнай справы няпоўна, аднабакова і неаб'ектыўна. Старшыня савету вэтэранаў Вера Дзьмітрыева, якая абвінаваціла прафсаюзьніка, сама была прыцягнутая да адказнасьці за нявыдачу кнігі заўвагаў. Як мяркуе Віктар, сустрэчнае абвінавачаньне з боку вэтэранаў было высунутае на патрабаваньне адміністрацыі ААТ «Полацак-Шкловалакно».

Старшыня Свабоднага прафсаюзу Беларускага Мікола Шарах: «Мы пастаянна спрабуем накіраваць стасункі прафсаюзу і адміністрацыі заводу "Шкловалакно" ў рэчышча сацыяльнага партнэрства, перамоваў. Аднак у адказ адміністрацыя выкарыстоўвае свой адміністрацыйны рэсурс, каб уціскаць рабочых і актыў прафсаюзу. Гэты чарговы штраф нашаму актывісту – працяг неадэкватных паводзінаў кіраўніцтва прадпрыемства і залежнай ад яго арганізацыі вэтэранаў».

Разгляд скаргі ў Віцебскім аблсудзе доўжыўся 19 хвілін. 14 зь іх Віктар выказваў свае аргумэнты на карысьць адмены адміністрацыйнага штрафу:

Па-першае, па тых самых падзеях старшыня вэтэранаў прыцягнутая да адказнасьці ў выглядзе папярэджаньня.

Па-другое, з дакумэнтаў справы можна зрабіць выснову, што Дзьмітрыева зрабіла загадзя фальшывую заяву ў міліцыю. У заяве ветэранаў сказана, што яны выклікалі міліцыю, але Полацкі РАУС абверг гэтае сьцьверджаньне.

Па-трэцяе, Віктар сам выклікаў міліцыю, каб зафіксаваць факт нявыдачы кнігі заўвагаў. З размовы, запісанай на аўдыё, вынікае, што актывіст прафсаюзу ня меў намеру перашкаджаць дзейнасьці савету вэтэранаў.

У скарзе Віктара Стукава гаворыцца: «З маёй размовы зь дзяжурным РАУС вынікае, што я рабіў усьвядомленыя захады, каб не перашкаджаць дзейнасьці арганізацыі вэтэранаў.

Дзяжурны РАУС – ...ну так мы зараз прыедзем і будзем разьбірацца, таму чакайце.

Стукаў В.Я. – ...я пачакаю Вас у калідоры, каб не перашкаджаць ім працаваць.

Такім чынам, гэта даказвае адсутнасьць суб'ектыўнага боку правапарушэньня, якое мне інкрымінуюць. З майго боку ёсьць усьвядомленае псыхалягічнае стаўленьне да арганізацыі савету вэтэранаў: выйсьці з памяшканьня і не замінаць іх дзейнасьці».

Выслухаўшы довады прафсаюзнага актывіста, судзьдзя манатонна зачытала ўжо гатовае рашэньне: «Пастанову Полацкага суду пакінуць бязь зьменаў, а скаргу – без задавальненьня».

Судзьдзя патлумачыла Віктару, што ён мае 6 месяцаў на абскарджаньне рашэньня Віцебскага абласнога суду старшыню суду і ў Вярхоўны Суд.

Аляксандар Марозаў

Залагініцца каб дадаць камэнтары