Малады бацька з Наваполацку памёр пасьля зьбіцьця міліцыянтамі
Гэтая гісторыя распачалася ў сьнежні 2011 году. Многія жылі падрыхтоўкай да Калядаў і Новага году. І тое, што малады чалавек нападпітку трапіў у шпіталь, ні ў кога ня выклікала зьдзіўленьня. 27-гадовы Алег Цімафееў увечары ў нядзелю выйшаў сустрэцца зь сябрам. Выпілі. Але дадому вярнуўся толькі раніцай. Зьбіты. «Мянты пабілі», — патлумачыў бацькам. А ўначы яго забралі ў шпіталь і праапэравалі. У шпіталі ён і памёр.
Былога прэтэндэнта ў прэзыдэнты Сяргея Рыжова зьбілі ў мэдвыцьвярэзьніку
Экс-прэтэндэнт у кандыдаты на пасаду прэзыдэнта на выбарах 2010 году Сяргей Рыжоў заявіў, што 16 лістапада быў жорстка зьбіты ў віцебскім мэдвыцвярэзьніку. Яго даставілі туды ўвечары. Паводле ягоных словаў, прывязалі да крэсла і білі ў грудзі нагой. Паводле Сяргея Рыжова, гэтую справу зараз разьбірае Сьледчы камітэт.
Віцебскі абласны суд часткова задаволіў патрабаваньні актывістаў
Хрыстафор Жаляпаў і Аляксей Гаўруцікаў абскарджвалі пастанову Першамайскага райсуду, куды яны зьвярнуліся пасьля атрыманьня чарговай забароны на правядзеньне пікету. Як і раённы суд, калегія Віцебскага абласнога суду прызнала забарону законнай, але накіравала на перагляд справу ў той частцы, якая тычылася адмоваў ад супрацоўніцтва з актывістамі з боку міліцыі і цэнтральнай гарадзкой паліклінікі.
Віцебскі праваабаронца просіць улады дазволіць яму правесьці бліц-пікетаваньні
Тры заяўкі на пікеты – па адной у адміністрацыю кожнага з раёнаў Віцебску – падаў праваабаронца Павал Левінаў. Правядзеньне пікетаў заяўленае ў месцах, адмыслова адведзеных мясцовымі ўладамі пад масавыя мерапрыемствы. У кожнай з акцыяў, згодна з заяўкамі, возьме ўдзел толькі адзін чалавек. І кожная зь іх будзе працягвацца… адну хвіліну. Усё гэта павінна адбыцца 10 сьнежня – у Сусьветны дзень правоў чалавека.
Свабодны прафсаюз Беларускі зладзіў акцыю ля прахадной ААТ «Полацак-Шкловалакно»
На прахадной ААТ “Полацак-Шкловалакно” ў пятніцу 15 лістапада быў выстаўлены сьцяг Свабоднага прафсаюзу Беларускага. Прафсаюз распаўсюджваў сваё інфармацыйнае выданьне «Мнение профсоюза». Прафсаюзны інфармацыйны дакумэнт раздаваўся рабочым, якія ішлі на зьмену і са зьмены.
Пераважная большасьць замежных студэнтаў у Віцебскім дзяржунівэрсытэце імя Машэрава - туркмэны
У Віцебскім дзяржаўным унівэрсытэце імя П. Машэрава навучаюцца 635 замежных грамадзян. Характэрна, што абсалютная большасьць - 500 чалавек - складаюць выхадцы Туркмэністану. Карэспандэнт выданьня «Витебские вести» пабываў у інтэрнаце №3 ВНУ, каб пабачыць, як жывуць выхадцы з сонечнага Туркмэністану.
У Віцебску шукаюць, хто сарваў «мадэрнізацыю»
Адмысловая камісія для вывучэньня ходу мадэрнізацыі ААТ “Віцебскдрэў” і праверкі выкананьня даручэньняў Аляксандра Лукашэнкі па пытаньнях дрэваапрацоўчай галіны створаная ў Віцебску, распавялі ў Камітэце дзяржаўнага кантролю па Віцебскай вобласьці. Задачай камісіі будзе правесьці аналіз ходу мадэрнізацыі ААТ “Віцебскдрэў”, знайсьці службовых асоб, вінаватых у зрыве тэрмінаў рэалізацыі праектаў мадэрнізацыі, якія дапусьцілі няякаснае выкананьне будаўніча-мантажных і праектных работ, і ўнесьці на разгляд міжведамаснай працоўнай групы прапановы пра прыцягненьне гэтых асоб да адказнасьці.
У Лёзьне паставілі бюст Марку Шагалу
Калісьці менавіта Лёзна называлі радзімай мастака. Цяпер дакладна вядома, што Марк Шагал нарадзіўся ў Віцебску, а ў Лёзьне жылі яго шматлікія сваякі, у тым ліку і дзядуля з бабуляй. Майстар пэндзьля ў аўтабіяграфічнай кнізе “Маё жыцьцё” пісаў: “Як я любіў прыязджаць у Лёзна, у твой дом, прапахлы сьвежымі каровінымі шкурамі! Барановыя мне таксама падабаліся. Уся твая амуніцыя вісела звычайна пры ўваходзе, каля самых дзьвярэй: вешалка з адзеньнем, капялюшамі, пугай і ўсім іншым глядзелася на фоне шэрай сьценкі, як нейкая фігура - ніяк не разгледжу яе як сьлед. І ўсё гэта мой дзядуля”.
Новае рашэньне КПЧ ААН: Беларусь парушыла правы Сяргея Каваленкі
Камітэт ААН па правох чалавека прыняў чарговае рашэньне наконт скаргі віцебскага актывіста КХП-БНФ Сяргея Каваленкі. Гэтым разам рашэньне станоўчае: камітэт прызнаў, што Рэспубліка Беларусь парушыла правы актывіста, і цяпер цягам 180 дзён дзяржаўныя чыноўнікі абавязаныя аднавіць яго правы, якія былі парушаныя, выплаціць адпаведную кампэнсацыю ды зрабіць захады, каб гэткіх парушэньняў правоў грамадзян з боку дзяржавы не было ў будучыні.
У Полацку затрыманыя грамадзкія актывісты
Полацкая міліцыя перашкодзіла прадстаўнікам грамадзкасьці ў правядзеньні сходу . У памяшканьні таварыства спажыўцоў 9 лістапада былі затрыманыя і дастаўленыя ў міліцэйскі пастарунак шасьцёра грамадзян, якія ўдзельнічалі ў сходзе. Затрыманьнем кіраваў старшы лейтэнант міліцыі Міхаіл Перапечкін ў прысутнасьці работнікаў ЖКГ. Пасьля апытаньня ў міліцыі ўдзельнікаў сходу адпусьцілі.