09.01.2024 Тэгі: грамадства, улады, выбары-2024 "Віцебская Вясна" паведамляе, што ў розных установах Полацку цягам арошніх двух тыдняў адбываюцца сустрэчы з дэпутаткай Палаты прадстаўнікоў Святланай Адзінцовай. Гэтыя сустрэчы назвалі "Школай падвышэння палітычнай пісьменнасці", і прысвечаныя яны лютаўскім выбарам.

Сцэнар «урокаў» паўтараецца з разу ў раз: дэпутатка расказвае пра змены ў выбарчай сістэме, а старшыня Полацкага райвыканкама Ігар Марковіч – пра паспяховае развіццё Полацку, якое наладжваецца ў тым ліку і пры дапамозе дзейных дэпутатаў. Сустрэчы адбываюца пераважна ў навучальных установах горада, на іх запрашаюць настаўнікаў у выхавацеляў дашкольных дзіцячых установаў. Не абмінае Святлана Адзінцова і буйныя прадпрыемствы, расказваючы пра важнасць выбараў. Аднак пытанні да яе паступаюць ад прысутных найчасцей з іншай нагоды. Мясцовая ўражэнка, спадарыня Адзінцова шмат гадоў працавала ў сферы медыцыны, і таму жыхароў Полацка цікавіць, як хутка будзе наведзены парадак у гэтай галіне, бо ў горадзе і раёне істотна бракуе медычных спецыялістаў рознага профілю.

Шмат пытанняў задаюць і старшыні райвыканкама, асабліва пасля ягонай справаздачы пра поспехі ў развіцці рэгіёна. Прыкладам падчас апошніх «заняткаў» у «Школе падвышэння палітычнай пісьменнасці», якія прайшлі ў СШ№14, прысутныя цікавіліся, калі ў горадзе будуць адрамантаваныя дарогі, што робіцца для падвышэння якасці медычных і гандлёвых паслуг, чаму кепска працуе гарадскі транспарт і мала пляцовак для заняткаў спортам. Дыскусія пра гарадскія праблемы сканчаецца традыцыйна: старшыня райвыканкама абяцае «узяць на кантроль» праблемныя пытанні і вырашыць іх у бліжэйшы час.

"Праваабаронцы за свабодныя выбары"

Крыніца: У Полацку перад выбарамі ладзяць "Школы падвышэння палітычнай пісьменнасці"