Пятніца, 13 Жнівень 2021

«Люцыфер у абліччы чалавека!» За абразу Лукашэнкі віцябляніна асудзілі на паўтара года калоніі

Ацаніць гэты матэрыял
(6 галасоў)
Падчас абвяшчэння прысуду Падчас абвяшчэння прысуду

Віцяблянін Юры Серабро быў прызнаны вінаватым у публічнай абразе прэзідэнта Рэспублікі Беларусь (ч. 1 арт. 368 КК РБ). За невялікі каментар у «Інстаграм», у якім мужчына параўнаў Лукашэнку з Люцыферам, суддзя Сняжана Кіндзеева асудзіла яго на 1 год і 6 месяцаў калоніі. Серабро ўзялі пад варту проста ў зале суду. Увесь працэс, не лічачы перапынку, доўжыўся ўсяго 40 хвілін.

«Суд пастанавіў Серабро Юрыя Аляксандравіча прызнаць вінаватым у публічнай абразе прэзідэнта Рэспублікі Беларусь і паводле часткі 1 артыкулу 368 КК РБ прызначыць яму пакаранне ў выглядзе пазбаўлення волі тэрмінам на 1 год і 6 месяцаў з адбываннем пакарання ў калоніі ва ўмовах агульнага рэжыму», – агучыла прысуд суддзя Сняжана Кіндзеева.

Яна пастанавіла таксама змяніць меру стрымання з падпіскі аб нявыездзе на арышт. Юры Серабро быў узяты пад варту проста ў зале суду: трое супрацоўнікаў МУС зайшлі ў судовую залу падчас пасяджэння, яшчэ да таго як быў агучаны прысуд – загадзя гатовыя да выраку зняволення.

Мабільны тэлефон «Самсунг», з якога быў напісаны каментар, канфіскуецца ў даход дзяржавы, арышт з легкавога аўтамабіля здымаецца.

Трое сутак, ад 19 да 22 траўня, праведзеныя ў ІЧУ, будуць залічаныя. Да суду Юры Серабро знаходзіўся на волі пад падпіскай аб нявыездзе. На працэсе ён цалкам прызнаў сваю віну і прасіў суд не адпраўляць яго за краты.

Уладзімір Бяляўскі