Субота, 17 Сакавік 2018

Вінцук Вячорка сустрэўся з жыхарамі Полацку

Ацаніць гэты матэрыял
(1 голас)

У полацкай кавярні «Разлог» 13 сакавіка прайшла сустрэча палачан зь беларускім палітыкам і мовазнаўцам, лідэрам партыі БНФ з 1999 па 2007 гады Вінцуком Вячоркам. Сустрэча адбылася ў межах падрыхтоўкі да сьвяткаваньня стагодзьдзя абвяшчэньня незалежнасьці Беларускай Народнай Рэспублікі 25 сакавіка 1918 году. Арганізавала сустрэчу грамадзянская ініцыятыва палачан, аматараў беларускай мовы «Жывая мова».

На сустрэчу сабралася каля трох дзясяткаў мясцовых жыхароў, якія запоўнілі ўсё памяшканьне невялікай кавярні ў старой частцы гораду Полацку.

Свой выступ Вінцук Вячорка пачаў з ацэнкі апошняга кліпа расейскага сьпевака Шнура, прысьвечанага 8 сакавіка, дзе ўжываецца беларуская мова. Вінцук мяркуе, што гэты кліп – прыклад абразы ў адрас беларускай мовы і ўсіх беларускамоўных людзей. Бо акрамя пахабшчыны ў адносінах да жанчын беларуская мова выканаўцаў перакладаецца ў тытрах на расейскую, але моўнымі сродкамі іншага паэтычнага стылю.

Далей у сваёй лекцыі Вінцук Вячорка распавёў пра моўна-адукацыйныя дасягненьні Беларускай Народнай Рэспублікі.

Калі сьвяткаваць Дзень дзяржаўнасьці нашай мовы, то трэба адзначыць дату 3 красавіка 1918 году, калі кіраўнікі БНР прынялі пастанову пра адзіную дзяржаўную мову – беларускую, – сказаў Вінцук Вячорка.

Таксама было расказана пра дзеяча БНР Браніслава Тарашкевіча, які стварыў правапіс беларускай мовы. Яму ў 1918 годзе было ўсяго 25 гадоў. Фактычна тарашкевіца (як называюць гэта правапіс) зьяўляецца равесьніцай Беларускай Народнай Рэспублікі. Шмат было расказана пра адметнасьці беларускай мовы.

Пасьля лекцыі, якая доўжылася больш за дзьве гадзіны, усім удзельнікам была падораная кніга Вінцука Вячоркі «Не сьмяшыце мае прыназоўнікі». Пасьля лекцыі Вінцук яшчэ доўга падпісваў свае кнігі ўсім ахвотным і адказваў на пытаньні.

Аляксандар Марозаў

Залагініцца каб дадаць камэнтары