Што стала падставай для судовага разбору, пакуль не ясна, але вынік вядомы: хлопца асудзілі на 7 сутак.

Упершыню пад увагу сілавых структур хлопец трапіў яшчэ ў 2018 годзе. Тады падставай для судовага разбору стаўся інцыдэнт, які здарыўся на аршанскім стадыёне падчас матчу паміж футбольнымі камандамі Оршы і Ліды. Дзяжурныя міліцыянты заўважылі на шапцы Аляксея Сукорскага нашыўку з надпісам «A.C.A.B.». Супрацоўнікі міліцыі вырашылі, што гэтая абрэвіятура — скарочаны абразлівы выраз на адрас «калег» («All Cops Are Bastards» у перакладзе азначае «Усе копы — вырадкі»). Гэтае выслоўе нарадзілася, калі паліцыянты разганялі страйкі брытанскіх шахцёраў, якія пратэставалі супраць нізкіх заробкаў. Яно часта выкарыстоўваецца на татуіроўках, у тым ліку футбольнымі фанатамі.

Аляксея Сукорскага затрымалі. У яго дома правялі ператрус, а потым судзілі. У выніку хлопец двое сутак правёў пад вартай, а судовы разбор скончыўся штрафам за непадпарадкаванне міліцыянтам – яны сцвярджалі, што падчас затрымання Сукорскі хацеў ад іх уцячы.

Што да нашыўкі з літарамі, то надпіс «A.C.A.B.» быў прызнаны «экстрэмісцкім» у 2019 -м, і яшчэ раз – у 2021-м годзе. Такім чынам, «за экстрэмізм», як збіраліся, у 2018 годзе хлопца пакараць не ўдалося. Цяпер яго на тыдзень арыштавалі. Праваабаронцы высветляюць, што гэтым разам Аляксею Сукорскаму паставілі ў віну.

Паводле судовага раскладу, аршанская суддзя Юлія Вяршыніна прыняла рашэнне наконт пакарання хлопца ўсяго за 10 мінут. Такія хуткасныя разгляды палітычных «адміністратывак» ужо сталі звычайнай справай на Віцебшчыне.

Ігар Нікіцін