Пятніца, 05 Красавік 2019

Будуць судзіць Зьмітра Лупача – за “незаконнае пікетаваньне” на Дзень Волі ў Глыбокім

Ацаніць гэты матэрыял
(19 галасоў)
Зьміцер Лупач са сьцягам. Фота: racyja.com Зьміцер Лупач са сьцягам. Фота: racyja.com

На глыбоцкага журналіста-фрылянсэра Зьмітра Лупача міліцыянты склалі адміністрацыйны пратакол за парушэньне заканадаўства аб масавых мерапрыемствах (арт. 23.34 КаАП РБ). “Незаконнае пікетаваньне шыюць”, – паведаміў на сваёй старонцы ў Facebook журналіст. Суд адбудзецца 11 красавіка.

25 сакавіка глыбоцкія актывісты адзначылі Дзень Волі ўскладаньнем кветак да бюсту прэм’ера БНР Вацлава Ластоўскага, да мэмарыяльнай дошкі стваральніку нацыянальнага сьцяга Клаўдыю Дуж-Душэўскаму, на магілу сябра Саюзу беларускіх патрыётаў Альберта Бацяноўскага. Пасьля гэтага запусьцілі бел-чырвона-белы сьцяг на паветраных балёніках у неба.

У сьвяткаваньні бралі ўдзел 12 глыбачан. Усе дзеяньні актывістаў здымалі на камэры супрацоўнікі міліцыі ды КДБ, нікога не затрымлівалі. Адміністрацыйны  пратакол склалі толькі на Зьмітра Лупача.

Разгляд справы аб адміністрацыйным правапарушэньні адбудзецца ў Глыбоцкім раённым судзе 11 красавіка.

Суды пасьля Дня Волі ў Віцебску і Глыбокім

  • 10 красавіка, Віцебск: суд Першамайскага раёну, справа Міколы Качурца аб спагнаньні шкоды з Кастрычніцкага РАУС за зьнішчаны бел-чырвона-белы сьцяг (на Дзень Волі – 2018). Пачатак – 10.00.
  • 11 красавіка, Віцебск: суд Кастрычніцкага раёну, разгляд адміністрацыйных справаў супраць Міколы Качурца, Яраслава Кійко і Уладзімера Кійко – за фатаграфаваньне зь бел-чырвона-белым сьцягам на Дзень Волі – 2019. Суд прызначаны на 10.00.
  • 11 красавіка, Глыбокае: суд Глыбоцкага раёну, адміністрацыйная справа Зьмітра Лупача (арт. 23.34 КаАП РБ). Пачатак паседжаньня - 10.00.

Зьміцер Міраш

 

Залагініцца каб дадаць камэнтары