Праваабарончы цэнтр "Вясна" збірае факты палітычнага пераследу ў Беларусі за 22 і 23 лістапада. Рэпрэсіі супраць беларусаў за іх актыўную грамадзянскую пазіцыю і незадаволенасць дзеяннямі ўлады не спыняюцца: іх па-ранейшаму затрымліваюць, праводзяць ператрусы і ўжываюць іншыя формы ціску на грамадзян. Тэлеграм-чаты і каналы прызнаюць экстрэмісцкімі матэрыяламі і фарміраваннямі. Калі вас ці вашых блізкіх затрымалі, паведамляйце нам:
|
Затрыманні 23 лістапада
У Магілёве затрымалі маці з дачкой, паведамілі магілёўскія праваабаронцы.
Ад родных затрыманых стала вядома, што а 10:30 раніцы дадому да іх прыйшлі супрацоўнікі міліцыі і забралі дачку — Сенажэнка Лізавету. Праз некалькі гадзін была затрымана маці Лізаветы — Адзінцова Кацярына. На дадзены момант яны знаходзяцца ў РАУСе Ленінскага раёна.
Санкцыя была толькі на імя Лізаветы. Па словах родных, ператрусу дома не было, прычына затрымання звязана з экстрэмізмам — меркавана, з «забароненымі» telegram-рэсурсамі.
Затрыманні ў Мінску 22 лістапада
За ўдзел у пратэстах затрымалі супрацоўніцу «Острова чистоты». Затрыманне адбылося наўпрост у краме. 22 лістапада раніцай за ўдзел у леташніх пратэстах супрацоўнікі ГУБАЗіКа затрымалі дзвюх супрацоўніц крамы бытавой хіміі «Остров чистоты» ў Лошыцы. Як паведамілі праваабаронцам «Вясны», затрыманыя — 26-гадовая Вікторыя Ганчарова і 34-гадовая Вольга Маліноўская. Затрыманне адбылося з розніцай у гадзіну. Па папярэдняй інфармацыі, Вікторыю ідэнтыфікавалі па фота са СМІ з акцыі 20 верасня мінулага году, дзе пратэстоўцы стаяць у счэпцы і перакрываюць дарогу. Увечары Вольгу адпусцілі, а Вікторыю змясцілі ў ізалятар.
Таксама ў Мінску быў затрыманы 25-гадовы Данііл Касенка. Вядома толькі, што ён быў затрыманы ў цэнтры горада і быў на машыне. Яго змясцілі на Акрэсціна. Прычына затрымання пакуль невядомая.
Паведамляецца пра затрыманне ў сталіцы Аліны Забаштанскай. Прычыны і абставіны затрымання таксама пакуль невядомыя.
Матэрыялы інтэрнет-рэсурсу «Барысаўскія навіны» прызнаныя экстрэмісцкімі.
На 22 лістапада ў магілеўскі КДБ выклікалі Ларысу Кастусёву, жонку зняволенага лідэра Партыі БНФ Рыгора Кастусёва. Пра гэта паведамляе рэгіянальны рэсурс «Магілёўскі рэгіён»
Што паслужыла падставай для выкліка, спадарыня Ларыса не ведае, – кажа, што вельмі расхвалявалася, і таму не ўдакладніла ў супрацоўніка КДБ падрабязнасці. Але магчыма, выклік неяк звязаны з арыштам на іх агульную з Рыгорам маёмасць, выказала меркаванне Ларыса Кастусёва.
Палітвязні
Новая крымінальная справа на палітвязня Міхаіла Чамураку
Праваабаронцам стала вядома, што на актывіста з Дуброўна, палітзняволенага Міхаіла Чамураку заведзена новая крымінальная справа - па арт. 130 Крымінальнага кодэксу (Распальванне варожасці). Што менавіта стала падставай для ўзбуджэння справы, пакуль невядома.
У дадзены момант Міхаіл Чамурака адбывае пакаранне ў выглядзе трох гадоў "хіміі" ў папраўчай установе адкрытага тыпу №29 у Ваўкавыску. Ён асуджаны па крымінальнай справе за паклёп у дачыненні да старшыні выбарчай камісіі (арт. 188 КК).
Палітзняволеная Анастасія Нікіціна адбыла пакаранне і выйшла на волю. Яе адразу дэпартавалі ў Расію
Як стала вядома праваабаронцам «Вясны», 40-гадовая Анастасія Нікіціна днямі была вызваленая з гомельскай жаночай калоніі №4 пасля адбыцця пакарання. Нагадаем, у сакавіку ў судзе Фрунзенскага раёна Мінска яе асудзілі да 13 месяцаў пазбаўлення волі па арт. 339 Крымінальнага кодэкса (хуліганства) за раскіданыя каля пракуратуры Мінска самарэзы.
Жанчына да затрымання жыла ў Мінску і мае дваіх непоўнагадовых дзяцей. Пасля вызвалення яе дэпартавалі ў Расійскую Федэрацыю. Верагодна, яна грамадзянка Расіі.
На волю выйшаў палітзняволены актывіст Аляксей Раманаў. Ён цалкам адбыў пакаранне
23 лістапада на волю выйшаў гомельскі актывіст Аляксей Раманаў. Аляксей актыўна ўдзельнічаў у агітацыйных пікетах штабу Святланы Ціханоўскай як валанцёр. На пікеце ў Хойніках 28 ліпеня мужчына нэгатыўна выказаўся пра Аляксандра Лукашэнку, за гэта на яго пакаралі па арт. 368 Крымінальнага кодэксу да аднаго года калоніі. Пакаранне ён адбываў у глыбоцкай калоніі №13.
Аляксей мае інваліднасць 2-й групы ў сувязі з анкалагічным захворваннем. У калоніі ў яго значна пагоршаў стан.
Крыніца: Новыя затрыманні, крымінальныя справы і вызваленні палітвязняў. Хроніка пераследу 22-23 лістапада