У межах кампаніі салідарнасці #WeStandBYyou, арганізаванай швейцарска-нямецкай праваабарончай арганізацыяй “Libereco - Партнёрства за правы чалавека”, дэпутаткі Раса Юкнявічэне (Еўрапейскі парламент, Літва), Эва Эрнст-Дзедзіч (Нацыянальная рада, Аўстрыя) і Дэлара Буркхардт (Еўрапейскі парламент, Германія) сталі “хроснымі” беларускіх палітвязняў Юрыя Уласава, Марыны Глазавай і Алега Мазгова. 
Раса Юкнявічэне з групы ЕНП у Еўрапарламенце стала “хроснай” Юрыя Уласава. Яна заявіла:
“Прымаючы ўдзел у гэтай кампаніі, я хачу запэўніць усіх, хто змагаецца за свабоду і дэмакратыю ў Беларусі, у тым, што вы не адныя! Лукашэнка можа пасадзіць людзей за краты, але не можа закрыць іх ад свету. Жаданне свабоды не можа быць зачыненае ў турме. Я тут, каб сказаць палітвязням Беларусі, што мы з вамі. Мы бачым вас і чуем, нават калі вы ў вымушанай ізаляцыі”.
Эва Эрнст-Дзедзіч, прадстаўніца парламенцкай групы "Зялёныя" па знешняй палітыцы ў Аўстрыйскай нацыянальнай радзе, заявіла з нагоды свайго рашжння падтрымаць Марыну Глазаву:
“Я выказваю вялізную павагу ўсім грамадзянам Беларусі, якія не дазваляюць сябе запалохаць рэпрэсіямі і якія ўпэўнена адстойваюць свой дэмакратычны голас. Іх мужнасць і непахіснасць уражваюць. Я хацела б выказаць сваю салідарнасць з беларускім дэмакратычным рухам і, такім чынам, стаць “хроснай” палітвязніцы Марыны Глазавай дзякуючы праваабарончай арганізацыі Libereco. Яна была арыштавана, нягледзячы на тое, што артыкул 21 Міжнароднага пакта аб грамадзянскіх і палітычных правах, удзельніцай якога з'яўляецца і Беларусь, відавочна гарантуе права на свабодныя сходы. Таму я заклікаю неадкладна вызваліць Марыну Глазаву і астатніх палітвязняў у Беларусі”.
Дэлара Буркхардт, дэпутатка парламенцкай групы СДПГ у Еўрапарламенце, узяла шэфства над Алегам Мазговым. Яна заявіла:
“Я патрабую вызвалення палітвязня Алега Мазгова! Пасля прэзідэнцкіх выбараў 9 жніўня рэжым Аляксандра Лукашэнкі праводзіць жорсткія дзеянні супраць апанентаў, штабоў кандыдатаў, блогераў, мірных дэманстрантаў, прадстаўнікоў апазіцыі і грамадзянскай супольнасці. Падчас дэманстрацый адбываюцца шматлікія затрыманні, якія часта суправаджаюцца жорсткім абыходжаннем і катаваннямі. Адзін з іх ахвяраў — 25-гадовы Алег Мазгоў, вызвалення якога я патрабую, а таксама ўсіх іншых незаконна затрыманых”.
Нагадаем, 9 ліпеня, роўна за месяц да прэзідэнцкіх выбараў у Беларусі, нямецка-швейцарская праваабарончая арганізацыя “Libereco — Партнёрства за правы чалавека” распачала кампанію салідарнасці з беларускімі палітвязнямі.
Кампанія пад назвай #WeStandBYyou заклікае да салідарнасці з усімі людзьмі ў Беларусі, якія імкнуцца да свабодных і сумленных выбараў, дэмакратызацыі краіны, вяршэнства закона і павагі да правоў чалавека. Усе, хто хоча падтрымаць ахвяраў палітычнага пераследу ў Беларусі, могуць зрабіць гэта ў сацыяльных сетках з дапамогай хэштэга #WeStandBYyou.
З пачатку кампаніі #WeStandBYyou дэпутаты еўрапейскіх парламентаў сталі “хроснымі” 46 палітвязняў у Беларусі. Яны паабяцалі зрабіць усё магчымае дзеля вызвалення зняволеных.
Нямецкія і аўстрыйскія дэпутаты ўзялі шэфства над беларускімі палітвязнямі
Крыніца: Дэпутаткі з Літвы, Германіі і Аўстрыі далучыліся да кампаніі салідарнасці з беларускімі палітвязнямі