Міжнародная Федэрацыя за Правы Чалавека (FIDH) звярнулася ў Камісію па пытаннях памілавання пры Прэзідэнце Рэспублікі Беларусь з просьбай запрасіць віцэ-прэзідэнта і праваабаронцу Валянціна Стэфановіча на пасяджэнне па разглядзе хадайніцтва аб памілаванні асуджаных на смерць братоў Іллі і Станіслава Косцевых.
Магчымасць прысутнасці на пасяджэннях камісіі прадстаўнікоў дзяржаўных органаў, грамадскіх аб'яднанняў і СМІ замацаваная ў пункце 9 Палажэння аб парадку ажыццяўлення ў Рэспубліцы Беларусь памілавання асуджаных, вызвалення ад крымінальнай адказнасці асобаў, якія садзейнічалі раскрыццю і ліквідацыі наступстваў злачынстваў, зацверджаным Указам Прэзідэнта 03.12.1994 №250. Акрамя таго, пунктам 5 Палажэння прадугледжана, што пры разглядзе хадайніцтва аб памілаванні можа прымацца пад увагу ў тым ліку меркаванне грамадскіх арганізацый.
FIDH з'яўляецца адной з вядучых міжнародных арганізацый у галіне абароны правоў чалавека і адной з заснавальніц сусветнай кааліцыі супраць смяротнага пакарання. Разам са сваімі сяброўскімі арганізацыямі FIDH імкнецца да ўсеагульнай адмены смяротнага пакарання і выступае супраць прымянення смяротнага прысуду, незалежна ад злачынства або абставінаў.
"Мы б хацелі атрымаць магчымасць вочна прадставіць меркаванне FIDH па пытанні аб памілаванні братоў Косцевых перад камісіяй, і мы спадзяемся, што гэта меркаванне будзе ўлічана пры прыняцці рашэння па сутнасці пададзенага хадайніцтва", – гаворыцца ў звароце FIDH да камісіі, падпісаным прэзідэнтам арганізацыі Аліс Магвэ.
У Міжнароднай Федэрацыі за Правы Чалавека ўпэўненыя, смяротнае пакаранне раўнасільнае бесчалавечнаму абыходжанню і катаванням. Акрамя таго, вопыт FIDH паказвае, што смяротны прысуд часта з'яўляецца вынікам несправядлівага судовага разбору. Таксама FIDH нагадвае, што так званы папераджальны эфект смяротнага пакарання ніколі не быў даказаны. У снежні 2014 года 117 краін свету прынялі рэзалюцыю Генеральнай Асамблеі ААН, якая заклікае ўвесці універсальны мараторый на смяротнае пакаранне, і міжнародная тэндэнцыя на карысць усеагульнай адмены працягвае расці.
Нагадаем, 10 студзеня 2020 года Магілёўскі абласны суд асудзіў Іллю і Станіслава Косцевых да смяротнага пакарання. 22 траўня 2020 г., пасля таго, як апеляцыйная скарга асуджаных была адхіленая судовай калегіяй па крымінальных справах Вярхоўнага Суда Рэспублікі Беларусь і прысуд уступіў у сілу, Станіслаў і Ілля Касцевы падалі хадайніцтва аб памілаванні на імя Прэзідэнта Рэспублікі Беларусь. За 26 гадоў знаходжання ва ўладзе Аляксандр Лукашэнка памілаваў толькі аднаго чалавека, асуджанага на смерць.
Amnesty International заклікае Беларусь не расстрэльваць братоў Станіслава і Іллю Косцевых
