Тэрытарыяльная выбарчая камісія (ТВК) Гарадзенскага раёна адмовіла доўгатэрміноваму назіральніку кампаніі “Праваабаронцы за свабодныя выбары” Андрэю Коце ў акрэдытацыі. Андрэй Коця быў вылучаны назіральнікам на сходзе Беларускага Хельсінкскага камітэту. 19 траўня ён прыйшоў на першае пасяджэнне ТВК, на якім абіралася кіраўніцтва камісіі. Ужо напрыканцы пасяджэння, калі Коця пайшоў рэгістравацца, узнікла праблема.

Андрэй Коця. Фота "Радыё Свабода"

Выбарчай камісіі не спадабалася тое, што сакратара С.В. Чайкі, які падпісваў дакумент аб вылучэнні Андрэя Коці ў якасці назіральніка, няма ў спісе прысутных на пасяджэнні Рады БХК, якія пералічаны ў гэтым дакуменце.

Сакратар Чайка мог і не прысутнічаць на пасяджэнні – менавіта так раённая ТВК бачыць сітуацыю і гэтым матывавала адмову ў акрэдытацыі. 

Андрэй Коця плануе яшчэ раз звярнуцца ў камісію для акрэдытацыі. У выніку паўторнай адмовы ён будзе абскарджваць рашэнне Гарадзенскай раённай ТВК у абласной выбарчай камісіі.

"Праваабаронцы за свабодныя выбары"

Крыніца: Назіральніку Андрэю Коце адмовілі ў акрэдытацыі ў Гарадзенскай раённай ТВК