Як паведаміла праваабаронцам "Вясны" журналістка "Новага Часу" Дзіяна Серадзюк, на яе складзены новы адміністрацыйны пратакол па ч.3 арт. 23.34 КаАП за ўдзел у снежаньскіх антыінтэграцыйных акцыях. Новы суд прызначаны на панядзелак, 27 студзеня ў 11:00 у судзе Першамайскага раёна г. Мінска.  Нагадаем, 10 студзеня ўжо быў суд над Дзіянай Серадзюк, але суддзя Максім Трусевіч тады адправіў справу на дапрацоўку ў Першамайскі РУУС для “ліквідацыі недакладнасцяў”. На тым судовым паседжанні супрацоўнік АМАПу Віталь Івашкоў сцвярджаў, што бачыў, як Серадзюк ўдзельнічала ў акцыі 20 снежня з 18:00 да 18:40 на Кастрычніцкай плошчы, але ў гэты час журналістка была зусім у іншым месцы. На судзе былі прад'яўленыя доказы гэтаму.

Журналістка "Новага Часу" Дзіяна Серадзюк. Фота: spring96.org

"Відаць, такі загад: не спускаць вернутыя на дапрацоўку справы, а даводзіць да канца. Так, я ведаю, што дапрацавалі справу Лявона Баршчэўскага. Што да майго новага разгляду, я атрымала па пошце новы пратакол, у якім напісана, што 20 снежня я прымала ўдзел у несанкцыянаваным мітынгу ўжо з 21 да 21:30. З'явіўся ў маёй справе і новы сведка — міліцыянт Сяргей Астаф'еў, які бачыў мяне там. Адметна, што мінулыя двое сведак — АМАПаўцы Віталь Івашкоў і Вадзім Шайко — у новых сваіх тлумачэннях заявілі, што "памыліліся і абазналіся", калі сцвярджалі, што бачылі мяне з 18 да 18:40 на Кастрычніцкай плошчы. Але цяпер яны ўжо дакладна ўпэўненыя, што мяне бачылі. І мне вельмі цікава, як суд расцэніць такія паказанні з улікам таго, што гэтыя двое давалі падпіску аб адказнасці за дачу ілжэсведчанняў", — каментуе новы суд Дзіяна Серадзюк.

Рэпартаж з суда, дзе судзілі журналістку “Новага Часу”, дэпутата незалежнасці Беленькага, Юрыя Губарэвіча і іншых

Як праходзілі суды над людзьмі, якія рэалізоўвалі свае правы на мірныя сходы? Што казалі сведкі, якія сведчылі супраць іх? Якая атмасфера была ў судзе? Пра гэтае і іншае — ў рэпартажы “Вясны” з суда Першамайскага раёна г. Мінска.

Па падліках праваабаронцаў “Вясны” за снежань і студзень у краіне адбылося больш за 150 судовых пасяджэнняў, дзе судзілі актывістаў за ўдзел у мірных акцыях супраць інтэграцыі з Расіяй 7,8,20 і 21 снежня. На 21 студзеня агульная сума штрафаў, атрыманых удзельнікамі акцый, склала 109215,5 рублёў (прыкладна 51500$). 11 чалавек асуджаны агулам на 285 сутак арышту. 

Крыніца: "Памыліліся і абазналіся". Журналістку "Новага Часу" зноў будуць судзіць