Напачатку 2019 года Праваабарончы цэнтр “Вясна” абвясціў конкурс мастацкіх прац зняволеных папраўчых устаноў і іншых месцаў несвабоды. Цягам некалькі месяцаў было даслана некалькі дзесяткаў цікавых прац, якія ўсе жадаючыя маглі пабачыць на выставе “Мары з-за кратаў” на пляцоўцы “Тэррыторыя правоў”. Усяго было тры намінацыі. Першыя два месцы абірала прафесійнае журы, якое склалася з мастакоў Алеся Пушкіна, Руслана Вашкевіча і Артура Клінава. Трэцяе — прыз глядацкіх сімпатый.
Пераможцы:
1 месца і грашовы прыз у 200 рублёў атрымаў Валерый Сівакоў. Яго працу “Парад планет” у тым ліку адзначыў мастак Руслан Вашкевіч.
- Валерый Сівакоў, "Парад планет". Фота: ПЦ "Вясна"
Варта падкэсліць, што праца Валерыя Сівакова атрымала высокія ацэнкі і гледачоў.
“Тут відаць, што аўтар ведае нейкі бэкграўнд. Яго неба — не проста так, гэта начное неба Ван Гога. Зона, плот, калючы дрот, парад планет, які ён пабудаваў (Венера і Марс) - на мау думку, гэта вельмі глыбокая праца пры ўсёй сваёй простай падачы”,— пракаментаваў мастак Руслан Вашкевіч.
Другое месца і грашовы прыз у 100 рублёў — Аляксандр Марцута. Ён даслаў адразу два дзесяткі прац.
- працы Аляксандра Марцуты. Фота ПЦ "Вясна"
“Гэтае пано, гэта наогул адзін у адзін тое, што зрабіў Бэнксі ў Венецыі. Толькі там гэта быў міжнародны скандал поспеху, а тут гэта прыватнае амаль нікому не прыкметнае мастацтва. Тым яно і каштоўней”,— зазначыў Руслан Вашкевіч.
Трэцяе месца і прыз у 100 рублёў — у Арцёма Токара. Ён даслаў адразу некалькі прац, сярод якіх малюнак ў фарбах з сланечнікамі.
- сланечнікі Арцема Токара. Фота: ПЦ "Вясна"
Яшчэ адзін прыз — паўгадовая падпіска на “Белгазету”. Яе атрымаў Зміцер Філіпцоў за карыкатуру “Засталіся толькі адкідныя месцы”.
- карыкатура Зміцера Філіпцова. Фота: ПЦ "Вясна"
Каардынатарам конкурса выступіў праваабаронца Павел Сапелка, які займаецца маніторынгам пенітэнцыярнай сістэмы ў Беларусі.
- праваабаронца Павел Сапелка падчас выставы. Фота: ПЦ "Вясна"
“Выбраць пераможцу было вельмі складана сярод такой разнастайнасці жанраў і тэматыкі, некаторыя дасылалі цэлыя зборнікі вершаў ... Тыя, хто не сталі прызёрамі — гэта не таму, што ў іх працы былі горш”, — адзначыў Павел Сапелка.