LT News - шаблон joomla Оригами

Магілёўскага журналіста Уладзіміра Лапцэвіча выклікалі ў міліцыю

Уладзімір Лапцэвіч Па словах Уладзіміра Лапцэвіча, ён мусіў быў 15 чэрвеня наведацца ў міліцыю як асоба, у адносінах да якой вядзецца адмінпрацэс.Па інфармацыі mspring.online, яго абвінавачваюць у парушэнні артыкула 22.9 КоАП РБ і хочуць прыцягнуць за незаконны выраб прадукцыі СМІ для замежнай прэсы.

Гаворка ідзе пра матэрыялы ў штотыднёвік для беларусаў у Польшчы «Ніва» (Беласток). Уладзімір Лапцэвіч звярнуў увагу на тое, што ён з’яўляецца пазаштатным аўтарам, а не журналістам “Нівы”:

– Пра маю дзейнасць патрэбныя органы, у першую чаргу падатковая інспекцыя, у курсе. Я плачу падаткі, у мяне ўсё празрыста. Я здзіўлены, што міліцыя зацікавілася маімі артыкуламі ў “Ніве”. Тым больш, часопіс выходзіць толькі ў Польшчы, – пракаментаваў цікавасць міліцыі журналіст.

Уладзімір Лапцэвіч распавёў, што позву яму прынеслі ўвечары 14 чэрвеня прама дадому.

– Там было пазначана, што мяне чакаюць 20 чэрвеня. Аднак я ператэлефанаваў маёру Слаўнікаву, да якога мне трэба было з’явіцца, і папрасіў яго перанесці сустрэчу на 15-га, каб хутчэй з усім разабрацца. З яго слоў я зразумеў, што пратакола пакуль яшчэ няма, але справа ўжо ідзе, – заявіў карэспандэнт.

Праваабаронца Барыс Бухель бачыць у гэтым чарговы факт ціску на незалежных журналістаў:

– Відавочна, улады ўзяліся за нязручных журналістаў. Спачатку дзве справы супраць Аліны Скребуновой, цяпер выклікаюць Уладзіміра Лапцэвіча – і ўсё гэта ў кароткі тэрмін. Прычым па артыкуле КаАП, якая наўпрост парушае свабоду слова.

У міліцыі журналіста пратрымалі каля дзвюх гадзін. Па словах Лапцэвіча, у дачыненні да яго пакуль праводзіцца толькі праверка – яму задавалі загадзя падрыхтаваныя пытанні і склалі пратакол апытання.

– Маёр Яўген Слаўнікаў, як мне падалося, займаўся гэтай справай без належнага энтузіязму, нібы гэта фармальнасць. Я яму сказаў, што з’яўляюся не журналістам, а пазаштатным аўтарам, што ніякую інфармацыю я сам не здабываю, а толькі раблю агляды матэрыялаў прэсы, – распавёў Лапцэвіч па выхадзе з Ленінскага РАУС.

Пратакол аб адміністрацыйным правапарушэнні на журналіста пакуль не складалі. 20 чэрвеня карэспандэнт “БелаПАН” зноў павінен з’явіцца ў міліцыю, каб даведацца, ці будзе распачаты адмінпрацэс альбо ці будзе скончана праверка.

Крыніца: Магілёўскага журналіста Уладзіміра Лапцэвіча выклікалі ў міліцыю