У шосты дзень супрацьстаяння абаронцаў Курапатаў на месцы уваходу ў рэстаранны комплекс «Поедем поедим» адбылася нарада кіраўнікоў грамадскіх рухаў і партый.
Была прынятая праграма дзеянняў на бліжэйшы час, а таксама зацверджаны графік варты актывістаў.
Па словах сустаршыні ствараемай партыі БХД Паўла Севярынца, штодзённая варта ад 11 чэрвеня будзе доўжыцца ад 12 да 24 гадзіны, а ў выходныя аж да 2 гадзін ночы. Зараз за кожны дзень тыдня, згодна з “Планам Чахольскага-Дашкевіча”, будзе адказваць адна з сямі арганізацый: панядзелак – “Альтэрнатыва”, аўторак – Рух салідарнасці “Разам”, серада – Партыя БХД, чацвер – Партыя БНФ, пятніца – “Малады Фронт”, субота – “Еўрапейская Беларусь”, нядзеля – партыя КХП-БНФ.
Павел Севярынец паведаміў прысутным, што 11 чэрвеня будзе перададзены зварот заснавальнікам рэстараннага комплексу «Поедем поедим» кіраўнікам фірм „Белрэстінвест“ і „Белноватэкс груп“ Леаніду Зайдасу і Барысу Сурысу.
"Будзем патрабаваць ад іх альбо знесьці рэстаран, альбо перанесці рэстаранна-забаўляльны комплекс за межы сучаснай ахоўнай зоны, паколькі будаўніцтва ад самага пачатку вялося незаконна", - адзначыў Павал Севярынец».Кіраўнік грамадзкай дырэкцыі мэмарыялу Курапаты, адказны сакратар управы сойму КХП БНФ Алесь Чахольскі зачытаў па тэлефоне зварот Зянона Пазняка, які расцаніў адкрыццё рэстарану на месцы масавых растрэлаў як “Маскоўскую правакацыі, ініцыяваную КДБ”.
Удзельнікі акцыі пратэсту паведамілі што ў апошнія дні пачасціліся заезды да рэстарану аўтамабіляў з расійскімі нумарамі. Актывісты звязваюць гэта з тым, што праз некалькі дзён у Расіі пачнецца Чэмпіянат свету па футболу і турыстам, якія накіроўваюцца туды транзітам праз Беларусь, нехта прапаноўвае падсілкавацца менавіта ў гэтым рэстаране.
Пасля нарады удзельнікі пікетавання скандавалі лозунгі: “Кабак НКВД зачынены”, “Ганьба!” і “Не кабак, а музей!”.
Па звестках праваабаронцаў, за шэсць дзён пікетавання з моманту адкрыцця рэстарана 6 чэрвеня, супрацоўнікі міліцыі і ДПС склалі каля трыццаці пратаколаў аб адміністрацыйным правапарушэнні.
Крыніца: Абаронцы Курапатаў кансалідуюцца і прапануюць праграму дзеянняў Фота