07.08.2024 Тэгі: суды, крымінальны пераслед, палітвязні, свабода мірных сходаў У судзе Ленінскага раёна Брэста пятага жніўня абвясцілі прысуд суд яшчэ васьмі мясцовым жыхарам — Івану Амрэйчыку, Васілю Ніпарку, Аляксею Самайлюку, Анатолю Закурку, Ігару Сарокіну, Сяргею Дзямідзюку, Мікіту Яхімовічу і Валянціне Жукоўскай. Усіх абвінавацілі паводле ч. 1 арт. 342 Крымінальнага кодэкса за ўдзел у паслявыбарчых акцыях пратэсту 10 жніўня 2020 года. Як піша "Берасцейская Вясна", суддзя Дзмітрый Шурын прызначыў ім тэрміны ад паўтары да двух гадоў калоніі.

Брэст 10 жніўня 2020 года. Фота: binkl.by

Так, прызначаныя наступныя тэрміны:

• Анатолю Закурку, Ігару Сарокіну, Васілю Ніпарку — адзін год і шэсць месяцаў калоніі ва ўмовах агульнага рэжыму;
• Аляксею Самайлюку і Сяргею Дзямідзюку — два гады калоніі;
• Івану Амрэйчыку — два гады і тры месяцы калоніі ва ўмовах агульнага рэжыму;
• Мікіту Яхімовічу — два гады і шэсць месяцаў калоніі ва ўмовах агульнага рэжыму;
• Валянціне Жукоўскай — адзін год і пяць месяцаў калоніі ва ўмовах агульнага рэжыму.

Паводле звестак "Берасцейскай Вясны", усе абвінавачаныя задоўга да суда былі змешчаныя пад варту. Каго затрымалі яшчэ ў лютым 2024 года, кагосьці — цягам сакавіка гэтага года. Пазней усіх быў затрыманы Сяргей Дземідзюк — у красавіку 2024 года. Ігара Сарокіна затрымалі на мяжы ў лютым, калі ён вяртаўся з Польшчы, дзе працаваў электрыкам.

Такім чынам, ужо вядома пра 33 асуджаных паводле артыкула 342 КК за пратэсты ў Брэсце, якія праходзілі 10 жніўня 2020 года. Нагадаем, што за тую акцыю пратэсту актыўна судзілі ў 2021 годзе паводле арт. 293 КК і ўсім прызначалі калонію.

Крыніца: Яшчэ восем жыхароў Брэста асудзілі да калоніі за ўдзел у паслявыбарчай акцыі пратэсту