03.06.2024 Тэгі: суды, грамадства, палітвязні, рэпрэсіі На дадзены момант у Беларусі налічваецца 1395 палітвязняў, а колькасць іх павялічваецца амаль штотыднёва. Пры гэтым кожны месяц некалькі дзясяткаў палітвязняў выходзяць з месцаў зняволення або па заканчэнні тэрміну, або пасля суда да накіравання ў папраўчую ўстанову адкрытага тыпу (на "хімію"), ці пачатку адбыцця тэрміну на "хатняй хіміі". Па даных "Вясны", у траўні на волю выйшлі мінімум 28 чалавек, якія цалкам адбылі свае тэрміны. Яшчэ адзін палітвязень быў асуджаны да "хатняй хіміі" і вызвалены з СІЗА. За што палітвязні адбывалі тэрміны і колькі іх утрымлівалі ў месцах няволі — распавядае "Вясна" ў штомесячным дайджэсце. 

Палітвязень Уладзімір Малахоўскі — 3 гады, 3 месяцы і 12 дзён у зняволенні

57-гадовы Уладзімір — жыхар Віцебска, сябра партыі БНФ, прымаў удзел у назіранні за выбарамі. Палітвязень хварэе на анкалогію і мае 3 групу інваліднасці. 

Паводле абвінавачання па арт. 364 КК (гвалт у дачыненні да міліцыі), Малахоўскі падчас затрымання на акцыі пратэсту спрабаваў нанесці траўмуючыя ўдары па розных часцях цела міліцыянтаў, пашкодзіў форму, завалодаў міліцэйскім жэтонам, а пазней, ужо будучы затрыманым і знаходзячыся ў аўтазаку, распыліў газ з балончыку ў бок міліцыянтаў. Суд прызначыў палітвязню тры з паловай гады калоніі.

Палітвязень Андрэй Шульгат — 2 гады, 7 месяцаў і 14 дзён у зняволенні 

Андрэя затрымалі 29 верасня 2021 года па крымінальнай справе, распачатай за каментары ў інтэрнэце пасля гібелі супрацоўніка КДБ Дзмітрыя Федасюка і it-спецыяліста Андрэя Зельцэра. Яго абвінавацілі паводле арт. 369 КК (абраза прадстаўніка ўлады) і ч. 1 арт. 130 КК (распальванне сацыяльнай варожасці). Разгляд справы Андрэя адбыўся 5 кастрычніка 2022 года ў Віцебскім абласным судзе. Яму прызначылі тры гады пазбаўлення волі. Напачатку траўня палітвязень выйшаў на волю з магілёўскай калоніі № 15.

Палітвязень Яўген Мерунко — амаль 2 гады ў зняволенні 

Яўгена затрымалі 8 снежня 2021 года. Яго абвінавацілі па арт. 368 Крымінальнага кодэкса (абраза Лукашэнкі). 1 сакавіка 2022 года суд Навабеліцкага раёна г. Гомеля прызначыў Яўгену два гады абмежавання волі з накіраваннем у папраўчую ўстанову адкрытага тыпу.

З 5 чэрвеня 2022 года Яўген адбываў тэрмін у ПУАТ-55, а напрыканцы траўня выйшаў на волю.

Берасцеец Дзмітрый Гапанюк — больш за 1 год і чатыры месяцы ў зняволенні

Дзмітрыя затрымалі 9 студзеня 2023 года ў межах крымінальнай справы паводле арт. 342 КК, распачатай у Брэсце па падзеях 13 верасня 2020 года, калі падчас акцыі пратэсту людзі вадзілі карагод на праезнай частцы (так званая "карагодная справа"). Яму прызначылі 1,5 года калоніі.

Дзмітрый адбываў тэрмін у шклоўскай калоніі № 17.

Палітзняволеная Алеся Буневіч — 2 гады і 29 дзён у зняволенні

Алесю затрымалі ў красавіку 2022-га году, калі яна вярнулася з Літвы ў Беларусь. Буневіч абвінавацілі ў тым, што яна мусіла дапамагчы «рэйкавым партызанам» выехаць з Беларусі.

Спачатку яе вінавацілі ў "здзяйсненні тэрарыстычнага акта групай асоб па папярэдняй змове", але пасля справу перакваліфікавалі на «наўмыснае незаконнае перасячэнне мяжы арганізаванай групай» (ч. 3 арт. 371 КК). Вядома, што сваёй віны яна не прызнала.

17 лістапада 2022 года ёй прызначылі тры з паловай гады калоніі. Але на апеляцыі, якая прайшла 31 студзеня 2023-га, прысуд зменшылі на год.

Палітвязень Валянцін Музыкін — 2 гады, 7 месяцаў і 2 дні ў зняволенні

54-гадовага Валянціна абвінавацілі па ч. 1 арт. 130 КК "распальванне іншай сацыяльнай варожасці", а таксама па арт. 369 КК "абраза прадстаўніка ўлады". Суд праходзіў у закрытым рэжыме. У жніўні 2022 года суддзя Гомельскага абласнога суда Іван Котаў прызначыў палітвязню 2 гады пазбаўлення волі. Тэрмін Валянцін адбываў у бабруйскай калоніі № 2.

Берасцейцы Данііл Хабавец і Марк Антонаў — больш за 3 гады ў зняволенні

Іх абвінавацілі ва ўдзеле ў акцыі пратэсту ў Брэсце 10 жніўня 2020 года паводле ч. 2 арт. 293 Крымінальнага кодэксу (масавыя беспарадкі). 8 лістапада 2021 года ў судзе Ленінскага раёна Брэста Даніілу прызначылі 3 гады і 6 месяцаў калоніі ўзмоцненага рэжыму, а Марку — 4 гады.

Адзін палітзняволены выйшаў на волю пасля суда 

У траўні беларускія суды ў абсалютнай большасці прызначалі палітвязням пазбаўленне волі. Толькі адзін палітвязень у мінулым месяцы выйшаў на волю з СІЗА пасля суда — Андрэй Анпілогаў, якому прызначылі два з паловай гады "хатняй хіміі".

Але гэтыя даныя могуць быць няпоўныя, бо не ўсе вынікі судоў над палітвязнямі пакуль вядомыя праваабаронцам.

Крыніца: Дайджэст вызваленых: мінімум 28 палітвязняў у траўні выйшлі на волю па заканчэнні тэрміну