11.04.2024 Тэгі: палітвязні, пераслед, ціск, рэпрэсіі, экстрэмізм У Беларусі не спыняюцца затрыманні, ператрусы, катаванні ў ізалятарах, аказваецца ціск на палітвязняў, незалежныя медыяпрадукты прызнаюць "экстрэмісцкімі матэрыяламі і фармаваннямі". Праваабарончы цэнтр "Вясна" 10 красавіка 2024 году збірае факты палітычнага пераследу беларусаў і беларусак – інфармацыя ўвесь час дапаўняецца.
Калі вас ці вашых блізкіх затрымалі, паведамляйце нам:
|
У Глыбокім журналіста Змітра Лупача публічна абвясцілі "злачынцам"
- Зміцер Лупач
Фотаздымкі Змітра Лупача і дваіх ягоных дзяцей вывесілі на інфармацыйным стэндзе каля Глыбоцкага РАУС, дзе размяшчаюць абвесткі пра тых, каго шукае міліцыя. Цяпер там ёсць і асобны спіс пад назвай "Злачынцы", хаця суду над пераважнай большасцю гэтых асобаў не было і іх вінаватасць у нейкіх злачынствах не даказаная.
Пра Змітра паведамляецца, што ён "схаваўся ад следства", а таксама пазначана ч.1 арт. 361-4 КК (садзейнічанне экстрэмісцкай дзейнасці).
На гэтым самым стэндзе каля Глыбоцкага РАУС размешчаны і фотаздымкі ягоных дзяцей — сына Валянціна і дачкі Кацярыны, якія цяпер таксама жывуць у замежжы.
У глыбоцкі "спіс злачынцаў", абвешчаных такімі без суду і следства, трапіла і Людміла Барэйка, якая прыдумала лозунг "Стоп таракан". Следчы камітэт распачаў супраць яе "спецвытворчасць", бо жанчына таксама была вымушаная з’ехаць за мяжу, паведаміў БАЖ.
Сілавікі затрымалі бабруйскага кіроўцу пагрузчыка Андрэя Тарабенку
- Андрэй Тарабенка
У "пакаяльным" відэа ад 11 красавіка сцвярджаецца, што ён "аказваў садзейнічанне экстрэмісцкім фармаванням", прайшоў рэгістрацыю ў чат-боце плана "Перамога", а таксама ўдзельнічаў у паслявыбарчых акцыях пратэсту.
У Беларусі новае "экстрэмісцкае фармаванне" — гэта праект «Чаго брэшаш?», які займаецца разборам беларускай прапаганды
Адпаведнае рашэнне прынятае МУС 10 красавіка.
У Гродне затрымалі дырэктара агенцтва нерухомасці за каментары ў сацсетках
- Раман Смірноў
Паводле інфармацыі "Медыязоны", гаворка пра Рамана Смірнова.
На "пакаяльным" відэа ад 10 красавіка мужчына "прызнаецца" ў тым, што ўдзельнічаў у пратэстах, пісаў каментары пра службовых асоб і Лукашэнку, а таксама нібыта адпраўляў інфармацыю ў чат-бот "Беларусі галаўнога мозгу" і Nexta.
Сілавікі пахваліліся тым, як моцна збілі беларуса за каментар пра тэракт у Расіі
Падчас анлайн-стрыма з правакатарам мужчына разам з сябрам сказаў, што яны "святкуюць" тэракт у "Крокус Сіці Холе". На стале ў мужчын пры гэтым быў сцяжок са свастыкай.
Палітвязня Уладзіміра Гундара пазбавілі перадачы. Паўгода яго ўтрымліваюць у адзіночнай камеры
- Уладзімір Гундар падчас суда
Як паведаміла "Радыё Рацыя", палітвязня на год пазбавілі перадачы:
"З 1 сакавіка яго зноў пазбавілі перадачы. Хаця сядзіць ужо паўгода ў камеры-адзіночцы. Паводзіць сябе ніжэй травы, цішэй вады. Таму сам не ведае, за што. Магчыма, у іх там па плану штосьці такое бывае".
Нагадаем, фігуранта "справы Аўтуховіча асудзілі агулам да 20 гадоў калоніі па некалькіх крымінальных справах. Па прыбыцці ў калонію яго некалькі разоў змяшчалі ў штрафны ізалятар. Напачатку кастрычніка 2023 года стала вядома, што Гундару ўзмацнілі пакаранне і перавялі на турэмны рэжым.
Падтрымайце Уладзіміра: Турма № 4, 212011, Магілёў, Крупскай, 99А, Уладзімір Тадэвушавіч Гундар
Увечары 9 красавіка была затрымана актывістка Галіна Лагацкая
- Галіна Лагацкая
Яна пайшла у Кастрычніцкі РУУС Мінска забіраць свой тэлефон, які ў яе вынялі 2 гады таму і не аддавалі. Нагадаем, у сакавіку 2022-га году Галіне прызначылі 15 сутак арышту за лістоўкі "Не вайне" — гэта палічылі "несанкцыянаваным пікетаваннем". Зараз ж ёй паведамілі, што гатовыя аддаць тэлефон, таму і запрасілі ў РУУС.
Вядома, што яна "затрымана на 72 гадзіны", то бок, верагодна, да суда па адміністрацыйнай справе. Сутнаць абвінавачвання невядома.
Жыхарку Сянно судзяць па артыкуле аб парушэнні заканадаўства аб выбарах
- Галіна Гарбачова
Суд Сенненскага раёна 10 красавіка разглядае справу мясцовай жыхаркі Галіны Гарбачовай, паведаміў тэлеграм-канал "Витебск, я гуляю". Яе судзяць па рэдкім артыкуле 10.9 КаАП (парушэнне заканадаўства аб выбарах, рэферэндуме, рэалізацыі права заканадаўчай ініцыятывы грамадзян). Гэты артыкул прадугледжвае штраф памерам да 15 базавых велічыняў (600 рублёў). Пакуль невядома, што менавіта ставяць у віну Гарбачовай.
Аўтары канала прааналізавалі нядаўнія рашэнні суда ў банку дадзеных судовых рашэнняў па гэтым артыкуле. Так, беларусаў судзілі за фота бюлетэня, за вынесены з участку чысты бюлетэнь і за падачу старшыні ўчастковай камісіі пры рэгістрацыі ў якасці назіральніка пратакол пасяджэння аб'яднання, якое не зарэгістравана ў Мінюсце.
Сілавікі затрымалі дзяўчыну, якая ў 2020-ым годзе "перашкаджала праезду машыне ДАІ"
- Наталля Салук
Паводле інфармацыі "Медыязоны", гаворка пра Наталлю Салук.
Праўладныя тэлеграм-каналы сцвярджаюць, што супраць дзяўчыны распачалі крымінальную справу.