04.04.2024 Тэгі: грамадства, палітвязні, рэпрэсіі На дадзены момант у Беларусі налічваецца 1388 палітвязняў, а колькасць іх павялічваецца амаль штотыднёва. Пры гэтым кожны месяц некалькі дзясяткаў палітвязняў выходзяць з месцаў зняволення або па заканчэнні тэрміну, або пасля суда да накіравання ў папраўчую ўстанову адкрытага тыпу (на "хімію"), ці пачатку адбыцця тэрміну на "хатняй хіміі". Па данных "Вясны", у сакавіку на волю выйшлі мінімум 32 чалавекі, якія цалкам адбылі свае тэрміны. Яшчэ восем чалавек былі асуджаныя да "хатняй хіміі" і вызваленыя з СІЗА. За што палітвязні адбывалі тэрміны і колькі іх утрымлівалі ў месцах няволі — распавядае "Вясна" ў штомесячным дайджэсце. 

Палітвязень Дзмітрый Шчурко — 2 гады, 3 месяцы і 23 дні ў зняволенні

Дзмітрыя спачатку асудзілі за "крадзеж рацыі" ў амапаўца падчас акцыі пратэсту да двух гадоў "хіміі". Але ў студзені 2022 года палітвязня асудзілі яшчэ па трох артыкулах Крымінальнага кодэкса за каментары ў інтэрнэце. Канчаткова яму прызначылі два з паловай гады калоніі.

Свой тэрмін палітвязень адбываў у наваполацкай калоніі № 1, адкуль 6 сакавіка выйшаў на волю.

Палітвязень Міхаіл Калішук — 3 гады, 6 месяцаў і 28 дзён у зняволенні

Мужчына быў затрыманы і збіты супрацоўнікамі АМАПу 10 жніўня ў Брэсце. 21 траўня 2021 года Міхаіла асудзілі да чатырох гадоў калоніі за ўдзел у акцыі пратэсту ў Брэсце. 

Тэрмін Міхаіл спачатку адбываў у віцебскай калоніі № 3. Там на яго аказваўся ціск з боку адміністрацыі, а напрыканцы 2021 года яму ўзмацнілі пакаранне і перавялі ў магілёўскую турму.

Палітвязень Андрэй Рунцо — 2 гады, 8 месяцаў і 4 дні ў зняволенні 

Андрэй — грузчык, бацька дваіх дзяцей. Таксама ён мае інваліднасць трэцяй групы.

14 снежня 2021 года суд Дзяржынска і Дзяржынскага раёна прызнаў Андрэя вінаватым паводле арт. 364 (гвалт альбо пагроза прымянення гвалту ў дачыненні да супрацоўніка міліцыі) і арт. 389 (пагроза ў дачыненні да суддзі або народнага засядацеля) Крымінальнага кодэкса і асудзіў яго да трох гадоў пазбаўлення волі ў калоніі агульнага рэжыму.

Палітвязень Сяргей Карпеня — 2 гады і 25 дзён у зняволенні 

Жыхара Баранавічаў у снежні 2021 года асудзілі па ч. 1 арт. 368 КК да двух гадоў "хіміі". Паводле следства, 17 верасня 2020 года Сяргей "з мэтай нанясення шкоды гонару і годнасці прэзідэнту РБ" у тэлеграм-канале "Баранавічы-97%" пакінуў паведамленне з ненарматыўнай лексікай. 

Напрыканцы сакавіка палітвязень мусіў выйсці на волю з ПУАТ-39.

Палітвязень Уладзімір Рубашэўскі — 3 гады, 7 месяцаў і 19 дзён у зняволенні 

Уладзіміра затрымалі ў жніўні 2020 года. Вядома, што пры затрыманні ён быў моцна збіты. Яго абвінавацілі ва ўдзеле ў акцыі пратэсту ў Брэсце па ч. 2 арт. 293 Крымінальнага кодэкса (удзел у масавых беспарадках).

У траўні 2021 года Рубашэўскаму прызначылі чатыры гады пазбаўлення волі ў калоніі ўзмоцненага рэжыму.

Ён адбываў тэрмін у шклоўскай калоніі № 17.

Палітзняволеная Дар'я Афанасьева — 2 гады, 3 месяцы і 2 дні ў зняволенні

Дар'я — актывістка, фемблогерка вядомая як "Дафна". У Instagram дзяўчына вяла асветніцкую працу, распавядала пра сэксізм і фемінізм. Суд прызначыў ёй два з паловай гады зняволення за ўдзел у паслявыбарчых акцыях пратэсту ў жніўні 2020 года ў Мінску.

30 сакавіка Дар'я выйшла на волю з гомельскай жаночай калоніі № 4.

Палітвязень Яўген Каліноўскі — 3 гады, 7 месяцаў і 16 дзён у зняволенні

Яўген — былы студэнт БДУ. Ён быў затрыманы 27 ліпеня ў межах крымінальнай справы, узбуджанай па падзеях 14 ліпеня ў Мінску.

Суддзя суда Першамайскага раёна г. Мінска Максім Трусевіч 16 студзеня 2021 года асудзіў хлопца па арт. 342 и арт. 364 КК на чатыры гады пазбаўлення волі. Таксама суд пастанавіў спагнаць з Яўгена Каліноўскага кампенсацыю маральнай шкоды на карысць двух пацярпелых супрацоўнікаў АМАП агульнай сумай 2 500 рублёў.

Хлопец выйшаў на волю з магілёўскай калоніі № 15 напачатку сакавіка. 

Палітвязень Ілля Туркоў — 3 гады, 8 месяцаў і 1 дзень у зняволенні

Мінчук да затрымання працаваў спецыялістам па аперацыях з нерухомасцю. Быў затрыманы 27 ліпеня 2020 года. Яго прызналі вінаватым ва ўдзеле 14 ліпеня ў акцыях пратэсту (арт. 342 КК), а таксама "гвалце ў дачыненні да супрацоўніка органаў унутраных спраў" (арт. 364 КК).

Яго асудзілі да чатырох гадоў калоніі. Ілля адбывай тэрмін увіцебскай калоніі № 3, адкуль выйшаў на волю 28 сакавіка 2024 года. 

Восем палітзняволеных выйшлі на волю пасля суда

У сакавіку беларускія суды ў абсалютнай большасці прызначалі палітвязням пазбаўленне волі. Толькі восем палітвязняў у мінулым месяцы выйшлі на волю з СІЗА пасля суда — ім прызначылі "хатнюю хімію". Сярод іх:

• Ірына Сапрыгіна — два з паловай гады "хатняй хіміі";
• Уладзімір Лыкшын — два з паловай гады "хатняй хіміі";
• Аляксандр Лыкшын — два з паловай гады "хатняй хіміі";
• Пётр Патаповіч — тры гады "хатняй хіміі";
• Алена Патаповіч — тры гады "хатняй хіміі".

Але гэтыя дадзеныя могуць быць няпоўныя, бо не ўсе вынікі судоў над палітвязнямі пакуль вядомыя праваабаронцам.

Крыніца: Дайджэст вызваленых: мінімум 32 палітвязні ў сакавіку выйшлі на волю па заканчэнні тэрміну