31.01.2024 Тэгі: суды, крымінальны пераслед, адміністратыўны пераслед, грамадства, палітвязні, пераслед, ціск У Беларусі працягваюцца затрыманні, ператрусы, катаванні ў ізалятарах, аказваецца ціск на палітвязняў, незалежныя медыяпрадукты прызнаюць "экстрэмісцкімі матэрыяламі і фармаваннямі". Праваабарончы цэнтр "Вясна" 30-31 студзеня 2024 году збірае факты палітычнага пераследу беларусаў і беларусак – інфармацыя ўвесь час дапаўняецца.

31 студзеня

Праваабаронцам стала вядома пра рэйды сілавікоў па родных тых, хто з'ехаў за мяжу

Вядома, што людзей просяць угаворваць сваіх сваякоў вярнуцца ў Беларусь пра «камісію па вяртанні». Вядома пра як мінімум 3 выпадкі, калі да людзей прыходзілі з такімі прапановамі.

Нагадаем, праваабаронцам вядомыя і як мінімум 3 выпадкі, калі нягледзячы на «дамоўленасці», супраць людзей узбуджаюць крымінальныя справы пасля вяртання з-за мяжы.

Сілавікі апублікавалі «пакаяльнае відэа» з жыхаркай Віцебскай вобласці 

Паведамляецца, што затрыманай навапалачанцы Вользе Сачыўцы прызначылі штраф — 600 рублёў.

Супраць палітвязня Дзмітрыя Рэзановіча ўзбудзілі новую крымінальную справу 

Па ініцыятыве адміністрацыі івацэвіцкай калоніі № 22 супраць Дзмітрыя ўзбудзілі крымінальную справу паводле арт. 411 КК (злоснае непадпарадкаванне патрабаванням адміністрацыі калоніі). Дата суда пакуль невядомая.

Нагадаем, летась палітвязня перавялі ў ПКТ да сакавіка. Раней паведамлялася, што Дзмітрыя неаднаразова змяшчалі ў ШІЗА, а таксама пазбавілі спатканняў і перадач і пагражалі перавесці на турэмны рэжым.

Дзмітрыя затрымалі напрыканцы кастрычніка 2020 года. 22 снежня 2021 года Мінскі абласны суд прызначыў Аліневічу і Раманаву — па 20 гадоў калоніі; Рэзановічу — 19 гадоў калоніі; Дубоўскаму — 18 гадоў калоніі. Суд з першага пасяджэння адбываўся ў закрытым рэжыме.

На шклозаводзе «Нёман» у Бярозаўцы адбыўся чарговы рэйд сілавікоў

За «распаўсюд экстрэмісцкіх матэрыялаў» затрымалі 5 чалавек. Нагадаем, у жніўні на шклозаводзе затрымалі не меней за 9 чалавек, у лістападзе — каля 10 чалавек, у снежні — 8.

30 студзеня

Новы суд над палітвязнем

Сёння ў судзе Цэнтральнага раёну паводле арт. 188 Крымінальнага кодэксу (паклёп) пачалі судзіць Дзмітрыя Багачэнку.

Імаверна, суд праходзіць над 46-гадовым палітвязнем, гомельскім юрыстам-прадпрымальнікам, якому ў траўні 2023 году ўжо прысудзілі два гады пазбаўлення волі паволе ч. 1 арт. 130 Крымінальнага кодэксу.

У чым гэтым разам абвінавачваюць мужчыну — невядома. Справу разглядае суддзя Сяргей Кармановіч.

Крыніца: Новыя крымінальныя справы супраць палітвязняў, "рэйды" сілавікоў: хроніка пераследу 30-31 студзеня