08.01.2024 Тэгі: суды, крымінальны пераслед, палітвязні, экстрэмізм 
Брэсцкі абласны суд 8 студзеня пасля перапынку працягвае разгляд крымінальнай справы 68-гадовага жыхара Ляхавіч Барыса Вітко, які раней быў асуджаны за абразу суддзі паводле арт. 391 КК. 20 студзеня 2023 года суд Ляхавіцкага раёна прызнаў яго вінаватым і прысудзіў два гады абмежавання волі без накіравання ва ўстанову адкрытага тыпу (“хатняя хімія”).
На гэты раз палітвязню прад’явілі больш сур’ёзныя абвінавачанні па некалькіх артыкулах Крымінальнага кодэкса:
- ч. 1 арт. 368 – абраза Аляксандра Лукашэнкі;
- арт. 188 – паклёп;
- ч. 2 арт. 367 – паклёп у дачыненні да прэзідэнта;
- арт. 369 – абраза прадстаўніка ўлады;
- ч. 2 арт.368 – абраза прэзідэнта, здзесненая паўторна;
- ч. 1 арт. 130 – распальванне іншай сацыяльнай варожасці або варажнечы;
- ч. 1 арт.361 – заклікі да мер абмежавальнага характару (санкцый), накіраваных на прычыненне шкоды нацыянальнай бяспецы Рэспублікі Беларусь.
Новую справу з 4 студзеня разглядае суддзя Вера Філонік.
На першым судзе Барысу Вітко ставілася ў віну тое, што 30 верасня 2021 года ў тэлеграм-канале "Ляхавічы 97" ён напісаў абразлівы каментар у дачыненні да суддзі Мікалая Кміты.
Ляхавічы: Два гады хатняй «хіміі» за абразу суддзі
А напрыканцы траўня 2023 года стала вядома, што Барыса зноў затрымалі. Пра гэта паведамляў праўладны Telegram-канал. Супрацоўнікі АМАПу ў бронекамізэльках з аўтаматамі затрымалі мужчыну на тэрыторыі прыватнага дома па месцы пражывання ў в. Мядзведзічы Ляхавіцкага раёна. Там быў праведзены ператрус.
У апублікаваным відэа Барыс кажа, што яго затрымалі па падазрэнні ў абразе Лукашэнкі (артыкул 368 КК).
Нейкі час Барыса Вітко ўтрымлівалі ў ляхавіцкім ІЧУ, затым перавялі ў баранавіцкае СІЗА. Зараз ён знаходзіцца ў СІЗА-7.
У лістападзе 2023 года Барыса Вітко КДБ ўнесла ў “Спіс тэрарыстаў”, а раней яго прозвішча з'явілася ў "Спісе асоб, датычных да экстрэмісцкай дзейнасці".
Крыніца: У Брэсце ізноў судзяць палітзняволенага Барыса Вітко