11.05.2023 Тэгі: правы чалавека, рэпрэсіі Народная амбасада Беларусі ў Швецыі сумесна з іншымі амбасадамі і праваабарончым цэнтрам "Вясна" стварыла "Даведнік рэпрэсій" на англійскай мове. Дакумент адрасаваны міграцыйным чыноўнікам, адвакатам і праваабаронцам для ацэнкі ступені пагрозы, з якой сутыкаюцца беларускія ўцекачы.
У шматлікіх краінах беларусам вельмі цяжка атрымаць палітычны прытулак. Напрыклад, у Швецыі ў 2021 і 2022 гадах 98% беларусаў, якія падаваліся на палітычны прытулак, атрымалі адмову. Звязана гэта, у першую чаргу, з тым, што міграцыйныя ўлады, а часта нават адвакаты, не да канца разумеюць той узровень тэрору, з якім сутыкаюцца беларусы пасля задушэння пра-дэмакратычных пратэстаў 2020 года — і ў асаблівасці пасля пачатку агрэсіі супраць Украіны. Людзям, якія ніколі не жылі ва ўмовах таталітарнай дыктатуры, вельмі цяжка ўявіць, што ў цэнтры Еўропы могуць даваць вялікія турэмныя тэрміны за лайкі ў Фэйсбуку, грамадскую дзейнасць за мяжой, данаты палітзняволеным — альбо браць у закладнікі і саджаць у турму сваякоў актывістаў. Нягледзячы на тое, што Беларусь да вайны была гарачай тэмай у еўрапейскіх СМІ, узровень разумення роспачнай сітуацыі ў Беларусі застаецца вельмі нізкім. Рэпрэсіі дасканала дакументуюцца праваабарончым цэнтрам "Вясна" і іншымі праваабарончымі арганізацыямі, але ў сувязі з маштабнасцю тэрору, людзям бывае вельмі цяжка арыентавацца ў вялікіх аб'ёмах інфармацыі.
Народная амбасада Беларусі ў Швецыі, пры падтрымцы іншых народных амбасадаў і праваабарончага цэнтра "Вясна", стварыла невялікі даведнік на англійскай мове, які абагульвае інфармацыю пра тое, за якія дзеянні беларусы могуць быць рэпрэсаваныя. Дакумент прызначаны для дапамогі міграцыйным чыноўнікам, адвакатам і праваабаронцам ацаніць ступень пагрозы, з якой сутыкаюцца беларускія ўцекачы.
Дакумент будзе абнаўляцца ў ходзе развіцця падзей. Яго можна спампаваць тут:
Actions for which Belarusian citizens can be held criminally liable
