03.03.2023 Тэгі: суды, крымінальны пераслед, праваабаронцы, справа Вясны, гісторыі вязняў Асобы: Алесь Бяляцкі, Валянцін Стэфановіч, Уладзімір Лабковіч Сёння абвесцілі прысуд па гучнай справе "Вясны". Заснавальніку "Вясны" і Нобелеўскаму лаўрэату Алесю Бяляцкаму прызначылі 10 гадоў калоніі, яго намесніку і віцэ-прэзідэнту FIDH Валянціну Стэфановічу— 9 гадоў калоніі, каардынатару кампаніі "Праваабаронцы за свабодныя выбары" і юрысту Уладзіміру Лабковічу— 7 гадоў калоніі, і праваабаронцы Дзмітрыю Салаўёву — завочна 8 гадоў калоніі. Таксама ім прызначылі буйныя штрафы. Суддзя Марына Запаснік прызначыла на два гады калоніі менш, чым прасіў пракурор Аляксандр Кароль. Падчас прысуду рукі праваабаронцаў былі зашпіленыя ў кайданкі за спінамі. Мы папрасілі жонак палітзняволеных праваабаронцаў "Вясны" Наталлю Пінчук, Ніну Лабковіч і Аліну Стэфановіч пракаментаваць прысуд. 

"Гэта ніякае не змякчэнне прысуду"

Наталля Пінчук падчас цырымоніі ўручэння Нобелеўскай прэміі міру Алесю Бяляцкаму 10 снежня 2022 года ў Осла. Фота: Markus Schreiber

Наталля Пінчук, жонка Алеся, падкрэсліла палітычны матыў крымінальнай справы супраць праваабаронцаў:

"Прысуд, відавочна, вельмі жорсткі, каго бы гэта не тычылася — Алеся, Валянціна, Уладзіміра. Гэта жахлівыя тэрміны, калі падумаць, за што іх судзілі. Негледзячы на гэтыя 284 тамы крымінальнай справы і дастаткова доўгае разбіральніцтва, мы бачым, што ніякай доказнай базы ў абвінаваўцы не было і быць не магло. Гэты працэс, відавочна, супраць праваабаронцаў і за іх праваабарончую дзейнасць.

Тое, што Алесю прысудзілі не 12 гадоў, а 10 — гэта адзін за паказальных момантаў быццам бы адбылося змякчэнне прысуду. Але гэта ніякае не змякчэнне прысуду. Паўтаруся, што гэта тэрміны вельмі вялікія. Хто яны і за што ім прызначылі такія тэрміны? За забойства людзей, за прычыненне нейкай значнай шкоды? Не, ніводны аргумент, які прыводзіўся ў судзе, нават не меў доказнай сілы для таго, каб суд абвінаваціў іх па гэтых надуманных артыкулах".

"Дзень у турме — гэта мінус дзень жыцця з сям'ёй" 

Ніна і Уладзь Лабковічы са старэйшай дачкой Адэляй

Жонка Уладзя Лабковіча, якому прызначылі 7 гадоў калоніі, Ніна, звярнула ўвагу на тое, што палітвязням вельмі патрэбная нашая салідарнасць і падтрымка:

"Канешне, мы на цуд не спадзяваліся, але гэты "падарунак" у два гады для нас шмат, што значыць. Але ўсё роўна гэта вельмі балюча. Вельмі. Немагчыма прыняць. Бо дзень у турме — гэта мінус дзень жыцця з сям'ёй і дзеткамі. 

У часы татальнай несправедлівасці вытрымаць гэта можна толькі праз каханне, любоў сям’і, родных і шмат якіх добрых людзей. Ім там патрэбна нашая падтрымка, ведаць, што іх чакаюць, і што ўсё не дарма".

"Адказнасць таксама [прыйдзе незваротна]" 

Аліна Стэфановіч з дзецьмі на акцыі салідарнасці ў Грузіі ў 2021 годзе

Аліна Стэфановіч, жонка Валянціна, спаслалася на апошняе слова мужа і адзначыла, што ўсе вінаватыя ў палітычным пераследзе беларусаў будуць пакараныя:

"Вясна надыйдзе незваротна", — сказаў Валянцін у сваім апошнім слове. І я дадам, што і адказнасць таксама. Неба ўсё бачыць, і кожны атрымае тое, да чаго імкнуўся і што заслужыў".

Палітзняволеным праваабаронцам цяпер патрэбная наша салідарнасць! Падтрымайце іх лістамі, пасылкамі і грашовымі пераводамі: СІЗА-1, 220030, г. Мінск, вул. Валадарскага, 2, Аляксандру Віктаравічу Бяляцкаму, Валянціну Канстанцінавічу Стэфановічу, Уладзіміру Мікалаевічу Лабковічу

Ад 7 да 10 гадоў калоніі: агучылі прысуд палітзняволеным праваабаронцам "Вясны"

Нагадваем, за што пераследуюць нашых калегаў і коратка пераказваем судовы працэс над вясноўцамі, які цягнуўся два месяцы.

"Досыць, трэба спыняць гэтую грамадзянскую вайну!" Праваабаронцы "Вясны" выступілі на судзе з апошнімі словамі

Публікуем апошнія словы на судзе нашых калегаў — у аўдыё і тэкставай версіях, а таксама працягваем патрабаваць іх вызвалення.

Крыніца: "Ім патрэбна ведаць, што ўсё не дарма". Жонкі палітзняволеных вясноўцаў выказаліся пра прысуд