Мінскі гарадскі суд 3 лістапада асудзіў прадпрымальніка Станіслава Кузьміцкага да 15 гадоў пазбаўлення волі ва ўмовах узмоцненага рэжыму. Яго абвінавацілі ў адміністраванні больш за 30 тэлеграм-чатаў, у прыватнасці чатаў "97".
Судовы працэс доўжыўся з 15 верасня, суддзя – Яўген Хаткевіч.
Станіслава абвінавацілі па шасці артыкулах Крымінальнага кодэкса:
- ч.1 арт. 293 – масавыя беспарадкі;
- ч.1 арт. 290-4 – стварэнне арганізацыі для ажыццяўлення тэрарыстычнай дзейнасці альбо ўдзел у ёй;
- ч. 1 арт. 361 – стварэнне экстрэмісцкага фарміравання або ўдзел у ім;
- ч.1 арт. – арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх;
- ч. 3 арт. 361 – Заклікі да мер абмежавальнага характару (санкцый), іншым дзеянням, накіраваным на прычыненне шкоды нацыянальнай бяспецы Рэспублікі Беларусь;
- ч. 3 арт. 130 – распальванне расавай, нацыянальнай, рэлігійнай альбо іншай сацыяльнай варожасці або варожасці.
Падрабязнасці абвінавачання пакуль невядомыя.
Ён быў затрыманы напрыканцы снежня 2021 года і да суда ўтрымліваўся ў СІЗА №1 Мінска. Станіслава Кузміцкага КДБ Беларусі ўнёс у спіс асобаў, датычных да тэрарыстычнай дзейнасці.
Па матэрыялах следства, Станіслаў Кузміцкі, "маючы перакручаныя каштоўнасці і зменлівае разуменне слова "патрыятызм", мэтанакіравана ўступіў у тэрарыстычную арганізацыю і ўзначаліў асобныя рэсурсы сеткі "...97". Ён адміністраваў больш за 30 чатаў, якія пад жорсткім кантролем і кіраўніцтвам з-за мяжы напаўняў экстрэмісцкімі матэрыяламі. Мужчына фармаваў склад экстрэмісцкіх супольнасцяў, размяркоўваў ролі і арганізоўваў удзел іх чальцоў у акцыях пратэсту. Акрамя гэтага, ён прымаў меры па аб'яднанні і павелічэнні колькасці супольнасцяў: маральна падтрымліваў іх у гутарках прыватнага характару, арганізоўваў правядзенне сумеснага вольнага часу, распаўсюджванне агітацыйнай прадукцыі, нанясенне малюнкаў і надпісаў экстрэмісцкага характару на фасады збудаванняў".
Пры гэтым следствам дакладна даказана, што ён "асабіста шэсць разоў удзельнічаў у падобных супрацьпраўных дзеяннях. У выніку гэта прывяло да цяжкіх наступстваў у выглядзе масавых беспарадкаў і групавых дзеянняў, якія груба парушаюць грамадскі парадак, якія мелі месца на тэрыторыі Беларусі, а таксама іншых злачынстваў і адміністрацыйных правапарушэнняў экстрэмісцкага характару."
Суд пастанавіў прызнаць Станіслава Кузміцкага вінаватым і па сукупнасці пакаранняў асудзіў яго да 15 гадоў пазбаўлення волі ва ўмовах узмоцненага рэжыму.